Претседателката Гордана Сиљановска-Давкова заедно со министерот за надворешни работи и надворешна трговија, Тимчо Муцунски, остварила средба со генералниот секретар на Постојаниот арбитражен суд во Хаг, Марцин Цепелак, на која искажала загриженост за актуелната безбедносна состојба во светот и ја истакнала потребата од праведен и постојан мир.
Како што информира Кабинетот на Сиљановска-Давкова, според претседателката, решенијата за денешните предизвици „мора да се бараат во рамките на мултилатералниот систем“, при што се заложила за „зајакнување на улогата на Генералното собрание и преиспитување на механизмите за одлучување на Советот за безбедност“.
Во време на зголемени глобални тензии, оцени таа, институциите како Постојаниот арбитражен суд се неопходни за зачувување на меѓународниот мир и стабилност. Таа укажа дека за сите држави, а особено за малите и средните, почитувањето на меѓународното право претставува не само правна обврска, туку и морален императив. Претседателката ја истакна нашата подготвеност за зајакнување на соработката со ПАС преку потпишување меморандуми за разбирање, развивање партнерство со универзитетите и можности за пракса на младите професионалци во областа на меѓународното право, со што се согласи Генералниот секретар на судот, Марцин Цепелак, се наведува во соопштението.
Цепелак ја запознал претседателката Сиљановска-Давкова со историјата на Палатата на мирот во којашто е сместен Постојаниот арбитражен суд, со работата на судот и процедурите на одлучување.
© Vecer.mk, правата за текстот се на редакцијата
