Премиерот Христијан Мицкоски упати апел за зрелост до опозициските партии, повторувајќи го предлогот до опозициските партии за надминување на политичкиот ќорсокак околу измените на Изборниот законик. Тој повтори дека владината коалиција е подготвена бланко да го поддржи предлогот на опозицијата, под единствен услов – во него да биде гарантирано правото на глас на македонската дијаспора.
Мицкоски упати сериозни критики за досегашното однесување на опозициските лидери, обвинувајќи ги за незрелост, тактизирање и натегање околу технички детали во моменти кога државата треба да испорача клучни реформи.
„Имаме работа со неодговорни и незрели политичари во опозицијата. Ние, како владина коалиција, го усогласивме нашиот став и на маса им кажавме, еве, договорете се напишете го, се додека гласањето на дијаспората е вклучено во истиот, ние бланко ќе го поддржиме. Поминаа денови, тие се натегаа кој кого ќе го викне и каде ќе се одржи тој состанок помеѓу опозицијата. Денеска ги повикувам на зрелост и одговорност. И претседателите на ДУИ, СДСМ, Левица, крилата на Зијадин Села, на Арбен Таравари, да седнат заедно, како опозициски партии, да се договорат“, рече Мицкоски.
© Vecer.mk, правата за текстот се на редакцијата
