Соседна држава, која е членка на Европската Унија, користи дипломатски канали за да шири опасна теза и да лобира кај останатите партнери, на Македонија да ѝ се скратат сите европски фондови и финансиска помош! Оваа информација денеска ја обелодени премиерот Христијан Мицкоски од собраниската говорница, одговарајќи на пратенички прашања.
Според неговите зборови, зад ова стои јасна и подмолна стратегија: сопирање на македонскиот напредок и туркање на државата кон економски колапс.
„Ако ЕУ ѝ помага, Македонија ќе напредува. Затоа нивната теза е дека ако нема ЕУ фондови за земјава, тогаш таа ќе дојде пред банкрот, ќе биде приморана да клекне, да моли и на тој начин да се реализира тоа коешто се бара од нив“, истакна Мицкоски.
Премиерот објасни дека овие сериозни сознанија доаѓаат директно од неговите неодамнешни мултилатерални и билатерални средби со високи странски претставници, но одлучи во овој момент јавно да не открива за која соседна држава точно станува збор.
© Vecer.mk, правата за текстот се на редакцијата
