Министерот за внатрешни работи, Панче Тошковски, најави клучни законски измени кои на полицијата и даваат нови, поголеми овластувања за итна заштита на жртвите од семејно насилство. Главната новина е воведувањето итна мерка која полицискиот службеник ќе може да ја изрече веднаш на терен, без претходна согласност од жртвата или чекање судска одлука.
Ова овластување предвидува полицијата, врз основа на проценка на ризикот, веднаш да го отстрани сторителот од домот и да му забрани секаков контакт со жртвата во траење до 48 часа. По овој рок, Судот одлучува дали мерката ќе биде укината или продолжена до 30 дена. Паралелно со овие измени, МВР работи на обезбедување „боди-камери“ за полицајците, со цел точно документирање на интервенциите и спречување на релативизирањето на настаните во судските постапки.
„Клучната промена е во воведување на ново полициско овластување со кое што полицискиот службеник... ќе може веднаш да изрече итна мерка за заштита на жртвата, односно сторителот да го отстрани од домот, да му забрани приближување и да му забрани контакт со жртвата.“
© Vecer.mk, правата за текстот се на редакцијата
