Од изградба на згради до градење надеж - патот на Павел Андреев е доказ дека професионалниот успех и социјалната одговорност можат да одат рака под рака. Во ова интервју зборуваме за предизвиците, мотивацијата и визијата на Павел Андреев - основач на краудфандинг платформа, за нејзината иднина и успехот во Северна Македонија.
Г-дин Андреев, би можеле ли во неколку реченици да ни опишете со што се занимавате, од кога постои платформата PavelAndreev.ORG, која е нејзината цел и мисија?
Во моментов се занимавам со развој на меѓународна краудфандинг платформа, преку која собираме средства за медицински и немедицински кампањи. Сега сум фокусиран на градење локални заедници, како во Македонија, со цел да поддржиме Македонци кои им помагаат на други Македонци. Платформата беше лансирана во 2021 година, но активностите што ги спроведував пред тоа беа во почетна, аматерска фаза.
Денес, сѐ се развива на професионално ниво, а кампањите во Северна Македонија го докажуваат тоа - за само 9 месеци Македонците собраа околу 450 000 евра за своите сограѓани во потреба! Нашата цел е да собираме средства за различни доброволни акции, опфаќајќи и медицински и немедицински потреби. Работиме на организирање на транспарентно и професионално управување со кампањите, за да можеме да им помогнеме на оние на кои им е најпотребно!
Што би им рекле на луѓето кои сметаат дека „хуманитарните дела се работа на државата, а не на обичните граѓани“?
Тие луѓе се во право, се согласувам со нив! Социјалниот сектор, фондациите и здруженијата всушност ги пополнуваат празнините во општеството кои се резултат на недоволно добра политика, без разлика за која држава станува збор.
Не е случајно што особено на Балканот често се собираат средства за медицински кампањи - тоа е јасен знак дека здравствениот систем не е доволно развиен или има одредени проблеми. Во некои држави собирање на средства за лекување не е потребно, што покажува дека таму здравствениот систем функционира подобро. Сепак, и во тие држави се собираат средства за други социјални каузи.
Сите ние сме дел од едно општество и важно е да си подадеме рака. Да оставиме луѓе да гладуваат или да умираат од болести? Не можеме да не помогнеме кога има потреба.
Што ве мотивира да продолжите напред, дури и кога се соочувате со тешкотии? Која е двжечката сила на еден човек да помага?
Во различни фази од развојот на платформата, мојата мотивација се менуваше. На почетокот бев мотивиран да имам успешни кампањи секои неколку месеци. Потоа, се стремев кон една успешна кампања месечно, надевајќи се дека што повеќе луѓе ќе добијат шанса за лекување.
Знаете, лекувањето често трае една година или повеќе. Подоцна собрав тим, со кој успеавме да го направиме процесот поефикасен и по професионален.
Денес, по години напор, горд сум на трагата што ја оставаме во општествата во кои работиме. Целта ми е да го прошириме овој позитивен ефект во уште повеќе држави. Мојот сон е платформата да ги опфати сите 195 држави во светот и да продолжиме да оставаме позитивни траги во секое општество каде што делуваме.
Дали Македонците се сочувствителни луѓе?
Многу! Вие сте нација која може да биде пример - сочувствителни, со големи срца и исполнети со емпатија! Оваа грижа за другите не само што ве прави уникатни, туку и ги инспирира сите околу вас да бидат подобри и похумани.
Како се развива платформата во Македонија? Какви се досегашните резултати?
Повеќе од одлични! Организирани се меѓу 40 и 50 кампањи - некои веќе завршија, други сѐ уште се во тек - секој може да влезе во платформата и да донира. Досега, од македонските кампањи за македонски корисници, собрано е околу 450 000 евра. Ова е извонреден резултат за толку краток период и тоа е можно благодарение на вашата емпатија и солидарност. Без вашата поддршка, овој успех немаше да биде можен!
Каков совет би им дале на оние кои им е потребна помош, но се плашат или срамат да ја побараат?
Запознавајќи ги луѓето во потреба и разбирајќи ја нивната психологија, дојдов до важен заклучок - срамот од барање помош е повеќе предрасуда во умот на лицето во потреба, отколку реален проблем.
Побарајте помош - тоа не е недостојно, туку напротив, тоа значи дека сте искрени и навистина сакате поддршка!
Како може да се зголеми културата на донација?
Одговорноста во хуманитарните активности има две страни - кај донаторите и кај организациите. За организациите е важно да обезбедат јасни и точни информации, за да можат донаторите да бидат добро информирани.
Во мојата платформа се трудиме да бидеме целосно транспарентни, за да ја гарантираме довербата на нашите корисници. Донаторите, пак, треба да знаат како да препознаат лажни кампањи за да донираат на вистинското место.
Како да дознаам дали доброволната кампања е лажна или измамничка?
Лажните доброволни кампањи можат лесно да се организираат, па затоа е важно да се донираат преку платформи со долгогодишно искуство кои обезбедуваат заштита и правна одговорност. Меѓутоа, ако сепак одлучите да направите донација на лична сметка, проверете дали има социјални докази и медицинска документација за организирана кампања.
Отсуството на таква документација е црвено знаме! Проверете ги фактите и побарајте социјален доказ (social proof), за да бидете сигурни во вашата донација! На нашата платформа, ние секогаш ги проверуваме медицинските документи пред да започнеме кампања.
Каква порака би им испратиле на нашите читатели?
Мотото на платформата е: „Секоја кауза вреди!“
Најдете кампања или создадете сопствена, прифатете ја со целото срце и вклучете се! Оставете позитивен белег!
© Vecer.mk, правата за текстот се на редакцијата
