Конкретни и мерливи резултати во првите пет месеци од целосната примена на системот „Безбеден град“ покажуваат драстично подобрување на безбедноста на патиштата во Македонија. Бројот на загинати во сообраќајни несреќи е намален за огромни 40 проценти – од 55 жртви во истиот период минатата година, оваа година бројката е сведена на 33, се наведува во соопштението од ВМРО-ДПМНЕ.
Како што велат од владејачката партија, овие показатели потврдуваат дека системот има силен превентивен ефект и придонесува за поодговорно однесување во сообраќајот, со цел до 2030 година значително да се намалат смртните случаи и тешките повреди на патиштата.
По успешното воведување во Скопје, Тетово, Куманово, Велес, како и на клучните коридори 8 и 10, проектот продолжува масовно да се шири низ цела држава со цел да се покријат сите критични точки.
Во изминатиот период веќе се поставени камери кај Ново Село во општина Дебарца, а официјално започна и постепената имплементација на системот во Охрид. Од владејачката партија најавуваат дека безбедноста на граѓаните останува еден од највисоките приоритети.
Пробниот период на „Безбеден град“ започна на 1 декември минатата година и веднаш ја покажа реалната и загрижувачка состојба на патиштата. Во првите 24 часа беа регистрирани околу 110.000 прекршоци (најмногу за брзина), како и 5.000 поминувања на црвено светло и околу 1.000 нерегистрирани возила.
Сепак, веќе по првиот ден беше забележан пад на прекршоците за речиси 50 проценти. До официјалниот почеток на целосната примена, на 1 февруари 2026 година, дневниот број на прекршоци се сведе на само 500 до 600, што претставува намалување од повеќе од 99 проценти.
Како што се наведува во соопштението на ВМРО-ДПМНЕ, Владата останува посветена на модернизација и дигитализација со цел да обезбеди поефикасни институции и повисок степен на безбедност, обезбедувајќи ги сите потребни законски предуслови транспарентно и според европски стандарди.
© Vecer.mk, правата за текстот се на редакцијата
