Владата донесе нова Стратегија за конфискација на незаконски стекнат имот за периодот 2025–2028 година, наменета за унапредување на капацитетите на институциите кои се занимаваат со финансиски истраги и одземање на имот добиен на незаконски начин. За ова информираше вицепремиерот за добро владеење, Арбен Фетаи.
Според него, оваа стратегија е доказ за сериозниот пристап на Владата во борбата со организираниот криминал и корупцијата, со јасни мерки за подобрување на ефикасноста во одземањето на нелегално стекнат имот преку јакнење на одговорните институции.
Како приоритет во натамошната борба против корупцијата и организираниот криминал, покрај стратегијата, е најавено и формирање на Акциски план и механизми за следење и надзор за реализација на целите.
За поуспешно спроведување на целата оваа политика, ќе се воспостави Национален совет за финансиски истраги и конфискација, кој ќе биде надлежен за следење и координирање на утврдените активности.
Дополнително, кабинетот на вицепремиерот се очекува да игра централна улога во координацијата и поддршката на предвидените активности, со цел да се обезбеди трајна посветеност и поуспешна имплементација на стратегијата.
© Vecer.mk, правата за текстот се на редакцијата
