За пет години, можеби повеќе нема да носиме паметни телефони во џебовите, а екраните на допир ќе бидат заменети со нешто многу пореволуционерно. Технолошката индустрија моментално е во процес на трансформација што засекогаш ќе го промени начинот на кој комуницираме.
На чело на ова тектонско поместување се најистакнатите фигури на технолошкиот напредок: Илон Маск, Марк Закерберг, Сем Алтман и Бил Гејтс.
Иако паметните телефони досега беа неопходен дел од нашиот секојдневен живот, овие водечки технолошки иноватори тврдат дека крајот на употребата на овие уреди е неизбежен. Во иднина, наместо екрани и тастатури, технологијата ќе им овозможи на нашите тела директно да комуницираат со уредите, преку мозочни импланти, електронски тетоважи и очила за зголемена реалност (AR).
Ќе има само Неуралинк
Илон Маск, основачот на „Неуралинк“, компанија која го предводи развојот на мозочни импланти што би им овозможиле на корисниците да контролираат уреди само со своите мисли, верува дека физичките интерфејси, како што се екраните на допир, ќе станат минато. Првите верзии на новата технологија веќе се тестирани, а кај двајца корисници успешно беа имплантирани овие чипови, демонстрирајќи ја почетната функционалност на овој револуционерен систем.
Во јуни 2024 година, корисник со прекар „Не Елон Маск“ постави прашање на платформата X: „Дали би вградиле чип во вашиот мозок за да можете да го контролирате новиот телефон на X само со вашите мисли?“ Одговорот на Маск беше јасен и брз: „Во иднина нема да има телефони, само Неуралинк“.
Паметни очила, електронски тетоважи и тајни проекти
Слично на тоа, Марк Закерберг, основачот на платформата Мета, е посветен на развојот на очила за проширена реалност (AR). Тој предвидува дека овие очила постепено ќе ја преземат функцијата на паметните телефони до 2030 година.
„Верувам дека паметните очила ќе станат следната голема компјутерска платформа“, рече Закерберг во интервју за The Verge.
Овој премин кон понапредни технологии, според него, ќе биде сличен на оној што го доживеавме со преминот од компјутери на мобилни уреди.
Поранешниот основач на „Мајкрософт“, Бил Гејтс, инвестира во „Тек Татс“ - електронски тетоважи развиени од „Хаотик Мун“. Овие наносензорски тетоважи овозможуваат собирање, испраќање и примање податоци, а Гејтс верува дека еден ден тие ќе ги заменат паметните телефони.
Можностите се широки: од следење на здравствената состојба, преку GPS локација, до комуникација преку човечка кожа.
Иако технологијата е сè уште во развој, нејзиниот потенцијал е огромен, особено во областа на медицината, каде што би можела да овозможи рано откривање на срцеви и мозочни удари.
Сепак, се појавуваат и сериозни прашања за приватноста - ако личните податоци континуирано патуваат до централизирани бази на податоци, тоа отвора простор за масовна злоупотреба и контрола каква што не е видена досега.
Извршниот директор на OpenAI, Сем Алтман, во соработка со легендарниот дизајнер на Apple, Џони Ив, исто така работи на развој на нов уред со вештачка интелигенција кој би можел да ги замени паметните телефони, но не буквално.
„Мислам дека не треба ни да се обидувате да направите подобар телефон“, рече Алтман во септември 2024 година на промоцијата на OpenAI во Њујорк, алудирајќи дека тие истражуваат сосема нова категорија на уреди.
Проектот е сè уште во рана фаза и деталите се чуваат во тајност.
Развој на Apple
Сепак, не сите го делат ова гледиште за иднината. Спротивно на овие футуристички визии, Тим Кук, извршен директор на Apple, е еден од оние кои веруваат дека паметните телефони ќе задржат клучна улога во нашите животи долго време, нагласувајќи дека технологијата на паметни телефони сè уште не го достигнала својот зенит.
Во интервју за Wired, тој изјави:
„Сметаме дека паметните телефони ќе траат многу долго. Ќе има повеќе иновации.“
Apple неодамна го претстави iPhone 16, кој е интегриран со напредни можности за вештачка интелигенција за да го направи корисничкото искуство „што е можно поинтуитивно“. Кук верува дека треба да продолжиме со постепеното подобрување на паметните телефони, наместо радикално да ги напуштаме во корист на несигурни технологии.
© Vecer.mk, правата за текстот се на редакцијата
