Шкотланѓанецот Томас Робинсон е прогласен за виновен за измама откако било откриено дека продавал обичен увезен чај како „уникатен вид локален чај одгледуван на неговиот имот“, објавија британските медиуми.
Тој заработил речиси 600.000 фунти продавајќи чај за кој тврдел дека е од врвен квалитет, објави Скај њуз.
Робинсон го продавал чајот на луксузни хотели и специјализирани трговци на мало, тврдејќи дека го одгледува на својот имот во Пертшир, Шкотска, користејќи иновативни техники.
На својата веб-страница, каде што навел дека соработува со Кралските ботанички градини во Единбург, нудел неколку видови чај, кои ги продавал помеѓу 2014 и 2019 година.
Робинсон, кој исто така се претставувал како Томас О'Брајан, исто така ги намамил клиентите лажно тврдејќи дека има академски квалификации и награди во областа на производството на чај. Окружниот суд во Фалкирк вчера го прогласи за виновен по две точки од обвинението за измама, а ќе му биде изречена пресуда на 25 јуни.
© Vecer.mk, правата за текстот се на редакцијата
