Сигурно сте слушнале дека една кучешка година е еднаква на седум човечки, меѓутоа тој начин на пресметување е погрешен, а научниците открија како всушност правилно се пресметува.
Стареењето не е исто кај сите кучиња. Помалите кучиња живеат подолго и созреваат побавно, додека кај поголемите е обратно.
Научниците заклучија дека секои 4,4 килограми телесна маса го намалуваат животниот век на кучето за околу еден месец. Исто така, крзнените миленичиња стареат побрзо во раните години, а процесот на стареење се забавува во подоцнежните фази од животот. Секоја кучешка година не вреди еднакво, како што не е еднакво ни стареењето меѓу различните раси.
Врз возраста на кучето влијае и генетиката, па така кучето може да има тенденции за наследување болести. Секако, голема улога игра и начинот на живот, како што се исхраната, количината на движење и историјата на болести.
Како да пресметате
Калкулаторот кој прикажува како се пресметуваат кучешките години е направен според водичот и препораките на Американското ветеринарно медицинско здружение.
- Првата година од животот на средно големо куче е еднаква на првите 15 години од човечкиот живот.
- Втората година од животот е еднаква на 9 човечки години.
- Секоја следна година од кучешкиот живот е еднаква на околу пет човечки години.
Осмислена е уште една формула за претворање на кучешките во човечки години која се темели на методот на епигенетски часовник. За пресметување на кучешките години потребно е да се најде природниот логаритам од годините на вашето куче (ln), потоа тој број да се помножи со 16 и да се додаде бројот 31.
Формула: $16 \cdot \ln(\text{години на кучето}) + 31 = \text{човечки години}$
Пример: Ако вашето куче има 12 години, во човечки има 71 година. Формулата изгледа вака: $16 \cdot 2,5 + 31 = 71$.
Знаци на стареење
Постојат одредени знаци кои покажуваат дека кучето старее. Во нив спаѓаат: седи влакна, слаб вид и заматени очи, проблеми со слухот, вкочанетост на мускулите и зглобовите, артритис, помала активност, промени во однесувањето (зголемена вознемиреност, збунетост, раздразливост).
Стареењето на кучето сопствениците тешко го прифаќаат, затоа е потребно да се искористи секој момент со најдобриот пријател на човекот.
© Vecer.mk, правата за текстот се на редакцијата
