Во помала или поголема мера, сите одамна сме станале зависни од мобилните телефони. Статистиката покажува дека просечниот човек троши повеќе од 10 часа дневно на својот мобилен телефон, што неминовно води до напрегање на очите и болни главоболки. Но, правилото 20-20-20-2 може да биде спасоносно.
Кога гледаме во екранот на мобилниот телефон, нашите очи работат „прекувремено“. Американската академија за офталмологија предупредува дека додека користиме дигитални уреди, трепкаме три пати помалку од вообичаено, што предизвикува претерано напрегање на очите поради постојаното фокусирање.
Исто така, сината светлина дополнително ја оптоварува нашата мрежница.
Револуционерното правило 20-20-20-2
Експертите развија едноставен трик кој значително го намалува напрегањето на очите - правилото 20-20-20-2.
Имено, сè што треба да направите е на секои 20 минути да гледате во нешто на шест метри (20 стапки) од вас. За тоа време треба да трепнете 20 пати, а последната ставка е два часа дневна активност на надворешно светло.
Зошто ова правило делува?
Овој пристап им овозможува на очите природна пауза за одмор и ресетирање на фокусот.
Д-р Ајша Малик објаснува дека на нашите очи им треба редовно префрлување на фокусот од блиску на далеку за да се одржи флексибилноста и здравјето.
Исто така, препорачливо е да користите дополнителни поставки на вашиот мобилен телефон. Активирајте го ноќниот режим, намалете го контрастот на екранот и зголемете ја големината на фонтот за да го намалите напрегањето на очите, особено во услови на слаба осветленост.
Кога треба да побарате медицинска помош?
Доколку по примената на правилото 20-20-20-2 сè уште имате чести главоболки, заматен вид, суви или иритирани очи, и болки во вратот, време е да посетите офталмолог.
Не чекајте проблемите да станат посериозни – со навремени прегледи можете да спречите долгорочни последици и да го зачувате здравјето на очите, пренесува chop.edu.
© Vecer.mk, правата за текстот се на редакцијата
