На прв поглед, изгледа како суштество од некаков научно-фантастичен филм, особено поради неговата транспарентна структура. Сепак, е многу реално и понекогаш успева да залута во Јадранското Море.
Единки поврзани со заедничко ткиво
Станува збор за пирозом (Pyrosoma atlanticum), кој всушност е цела колонија од стотици илјади ситни единки, познати како зооиди.
Единките се поврзани со заедничко ткиво и нервен систем кој наликува на 'рбет, а заедно формираат транспарентна, желатинозна структура. Пирозомите обично се долги неколку сантиметри, но во ретки случаи можат да пораснат до импресивни 18 метри!
Овие морски суштества светат зелено или розово кога ќе дојдат во контакт со други предмети, а нивното треперење под вода може да се види од неколку метри оддалеченост, објавува Večernji.hr.
Како се размножуваат пирозомите?
Тие се хранат со планктон, откако ќе ја филтрираат морската вода, а истиот механизам им овозможува да се движат.
Тие се размножуваат бесполово - секој зооид може да создаде генетски идентични копии. Овој процес им овозможува на колониите да растат, да ги регенерираат оштетените делови и, во случај на распаѓање, да формираат нови колонии.
Пирозомите најчесто живеат во топли и тропски мориња, но во последниве години тие се повеќе се појавуваат во постудени води, а се забележани и во близина на Алјаска и во Јужниот Океан.
Клучна улога во екосистемот
Најновите снимки се направени во Атлантикот, додека пирозомите повремено се појавуваат и во Јадранското Море, каде што нивниот светлечки изглед остава силен впечаток кај нуркачите.
Кога умираат, тие тонат на морското дно и стануваат важен извор на храна за организмите од длабокоморските длабочини, со што играат клучна улога во океанскиот екосистем.
© Vecer.mk, правата за текстот се на редакцијата
