1 април не е национален празник, но секаде се прославува како ден кога се прават разни шеги.
Во Македонија се организираат маскенбали и карневали, каде што луѓето ги претставуваат своите костими, изведуваат низа досетки и воедно се забавуваат. Во некои земји како Канада, Нов Зеланд, Обединетото Кралство и Јужна Африка овој ден се одбележува само со кажување шеги, и тоа само до пладне. Во Франција, Италија, Јужна Кореја, Јапонија, Русија, Холандија, Германија, Бразил, Ирска, Полска, Австралија и САД шегите траат цел ден. За Франција и Италија, карактеристично е што освен со шеги, овој ден се одбележува и со маскенбали. Се проценува дека 1 април го прославуваат околу 1 милијарда луѓе низ светот.
Во истражувањата за тоа како и кога настанал Денот на шегата едно е сигурно, а тоа е дека тој се празнувал уште пред новата ера во Рим, но бил наречен Денот на будалите. Сепак, историјата на 1 април започнува во Франција кон крајот на 16 век.
Во средновековието во голем дел од европските градови Нова година се прославувала на 25 март. Во одредени области на Франција, Нова година била празник кој траел една недела и завршувал на 1 април, па токму оттука потекнуваат верувањата на некои писатели дека Денот на шегата дошол оттаму што оние што славеле на 1 јануари им се исмевале на оние што Новата година ја славеле на други датуми.
Исто така, традицијата за Денот на шегата постои и на Исток. Имено, Иранците меѓусебно се шегуваат на 13 ден на Персиската Нова година, која паѓа на 1 или 2 април. Овој празник е воспоставен уште во 536 година п.н.е. се вика Сиздах Бедар и е најстара традиција на шегата од тие кои ги познаваме денес. Поради тоа се верува дека Први април има свои корени и во оваа традиција.
Интересни првоаприлски традиции во светот
Една од најпознатите шеги, распространети во Франција и на француските говорни подрачја во Швајцарија и Канада е Априлската риба. Идејата е следна: луѓето едни на други си лепат на грбот риба од хартија. Секако, тоа жртвата не го забележува. Овој обичај постои и во некои делови на Италија, како и во белгиската покраина Антверпен. Веднаш во соседството, во фламанскиот дел на Белгија, традиција е децата на денешен ден да ги заклучуваат своите родители или наставници и да ги пуштаат само во замена на бонбони или колачи. Додека во Кореја на власт била династијата Јосеон (јули 1392 – октомври 1897) на кралското семејство и на двораните им било дозволено да се лажат меѓусебно, без оглед на хиерархијата, и тоа на првиот снежен ден во годината. Тие со снег ги полнеле чиниите, а потоа ги истурале на жртвата, под лажни изговори. Жртвата како губитник во играта морала да ја исполни желбата на тој кој го истурил снегот. Меѓутоа се смета дека тука измамите не биле намерно планирани, туку биле безопасни и често биле вид на добродетелство кон дворјаните. Во Полска Први април, исто така, е резервиран за вицеви, шеги и измами, кои освен населението ги практикуваат и медиумите, кои понекогаш и соработуваат, информациите да бидат со поголем кредибилитет. Посериозни активности обично се избегнуваат. Ова верување е толку силно што датумот на антитурскиот сојуз со Леополд во 1863 година кој бил потпишан на 1 април, бил променет на 31 март. Традицонална шега во Шведска на Денот на глупаците е да замолите некој да испорача запечатена порака, барајќи некаква помош. Меѓутоа, во ковертот се наоѓа порака: Не се смеј се туку лови глупаци уште еден километар.
Најдобри светски првоаприлски шеги
И медиумите се почесто се вклучуваат во првоаприлските шеги. Еве два најинтересни примери како не насамарија светските медиуми. На Први април во 1957 година BBC news шоуто Панорама најави дека благодарение на многу благата зима, швајцарските фармери до крајот на годината ќе можат да имаат берба на шпагети од дрвја.
Истиот ден во 1992 година, американското Народно радио во емисијата Разговор со нацијата, објави дека поранешниот американски претседател Ричард Никсон повторно ќе се кандидира за шеф на таа држава. Наводно, овој слоган на неговата кампања требало да биде: Не сум направил ништо лошо, ниту ќе направам.
© Vecer.mk, правата за текстот се на редакцијата
