Човековите права се под напад ширум светот, предупреди денеска генералниот секретар на Обединетите нации Антонио Гутереш, наведувајќи ги широко распространетите кршења на меѓународното право и страдањата на цивилите во конфликтите во Судан, Газа и Украина.
- Владеењето на правото е надвладеано од владеењето на силата – рече генералниот секретар на ОН Антонио Гутереш на отворањето на седницата на Советот за човекови права во Женева.
Тој истакна дека човековите права целно се потиснуваат и ги повика државите членки на меѓународните човекови права да не гледаат како на мени од кое можат да го избираат она што им одговара.
Гутереш силно застана во одбрана на системот на ОН за човекови права кој, според него, се наоѓа во режим на преживување поради намалувањето на буџетот, нападите врз поединечни експерти и повлекувањето на САД од еден од клучните механизми од областа на универзалните права.
- Хуманитарните потреби експлодираа, а финансирањето се урива – рече тој.
Канцеларијата на ОН за човекови права, како и другите делови на организацијата, се соочува со сериозна буџетска криза по одлуката на САД, најголемиот донатор на ОН, за намалување на финансирањето.
Портпаролот на ОН изјави дека Вашингтон во февруари уплатил околу 160 милиони долари, што е само мал дел од вкупно повеќе од четири милијарди долари долг кој таа држава го има кон светската организација.
© Vecer.mk, правата за текстот се на редакцијата
