Има многу причини зошто е добро да се биде среќен. Тоа ве прави подобри во работата, поздрави, со поголеми шанси за добри врски, па дури може и да ви го продолжи животот. Плус, ако сте ги искусиле и среќата и несреќата, веќе знаете дека да се биде среќен е многу позабавно.
Секако, самото знаење дека среќата е добра за вас нема да ве направи посреќни. Ако веќе се чувствувате несреќно, помислата дека ги пропуштате сите придобивки од среќата може само да направи да се чувствувате полошо.
Постојат периоди во животот кога е нормално да се чувствуваме тажни и не треба да се убедуваме во спротивното. Ако неодамна сте загубиле сакана личност, поминувате низ раскинување, сте ја изгубиле работата или сте претрпеле друг неповолен животен настан, тагата е здрава и природна. Спротивно на тоа, ако сте несреќни долго време и не знаете зошто, или мислите дека се борите со депресија, паметно е да побарате професионален терапевт или советник кој ќе ви помогне да ги расчистите работите.
Но, за многумина од нас, среќата е навика која можеме да ја негуваме. Тоа е така затоа што, благодарение на еволуцијата, човечкиот мозок е дизајниран да обрнува повеќе внимание на негативните мисли и стимули отколку на позитивните. Вреди да научиме како да посветиме повеќе внимание на позитивното во нашите мисли и животи, бидејќи нашата природна тенденција е да го занемаруваме. Тоа нè прави понесреќни отколку што треба да бидеме.
Во еден инспиративен напис на веб-страницата Psychology Today, д-р Чики Дејвис, консултант и експерт за технологија на среќата, нуди неколку едноставни техники кои ќе ве поттикнат да размислувате позитивно и ќе ја зголемат вашата општа среќа. Ова се некои од моите омилени:
1. Запрашајте се дали размислувате позитивно
Ова е важно прашање за размислување. Самиот чин на поставување на прашањето ќе ви помогне почесто да почувате со позитивни мисли. Тоа се должи на феноменот наречен метакогниција – „размислување за размислувањето“ – што е моќна помош за меморијата. Редовното прашување дали размислувате позитивно ќе ви помогне да се запомните да се фокусирате на позитивното. Тоа е одличен прв чекор.
2. Научете на памет листа на „среќни“ зборови
Можеби звучи неверојатно дека самото меморирање зборови поврзани со среќата е доволно за да ве направи посреќни, но тоа навистина функционира. Психолозите го мерат ова на скалата на „валентност“, каде што повисоките бројки означуваат поголема позитивност. Очекувано, зборовите како љубов, радост и бебе се меѓу оние со највисоки поени.
3. Користете асоцијации
Иван Павлов славно ги тренирал своите кучиња да лачат плунка секогаш кога ќе заѕвони со ѕвонче, поврзувајќи го звукот со храна. Можете да се истренирате на ист начин, создавајќи асоцијации кои ќе ги користите во своја корист.
Пример: По една работилница за медитација, авторот решил да ги користи чавките како потсетник. Секогаш кога ќе види чавка додека вози, тоа му служи како инстант потсетник да живее во моментот и да ужива во животот додека може.
4. Практувајте благодарност
Постојат многу докази дека благодарноста за добрите работи во животот, дури и за оние наједноставните, ве прави посреќни. Секое утро пред да станете од кревет, набројте три нешта за кои сте благодарни. Изберете метод што ви одговара – дали е тоа пред спиење, пред вечера со семејството или наутро.
5. Пишувајте по неколку минути секој ден за нешто што ве направило среќни
Во еден фасцинантен експеримент, испитаниците кои пишувале по 20 минути секој ден за „интензивно позитивно“ искуство пријавиле повисоко ниво на среќа и имале помалку посети кај лекар во следните три месеци. Вреди да се одвои време за ова. Исто така, д-р Дејвис предлага „уживање во моментот“ – кога некој ќе ви даде подарок или комплимент, застанете и задржете се на чувството колку тоа ве прави среќни.
6. Славете ги вашите успеси, дури и малите
Ако сте почнале да практикувате благодарност или сте напишале нешто позитивно – сметајте го тоа за победа. Дејвис вели дека треба да се бориме против тенденцијата да ги минимизираме сопствените достигнувања.
Таа исто така препорачува да се откажете од размислувањето „сè или ништо“. Ако сте планирале да пишувате секој ден, но сте успеале само четири дена во неделата, честитајте си за тие четири дена наместо да се прекорувате за трите што сте ги пропуштиле. Уживањето во малите достигнувања на патот е еден од најсигурните начини да бидете среќни колку што е можно повеќе.
© Vecer.mk, правата за текстот се на редакцијата
