Руски научници работат на револуционерен потфат – создавање на првиот лек за генска терапија во светот кој директно ќе го блокира процесот на стареење. Како што објави заменик-министерот за наука, Денис Секирински, проектот е фокусиран на генот RAGE, рецептор чија активација е главниот „прекинувач“ за стареење на клетките.
Истражувањето, кое се спроведува во рамките на националниот проект „Нови технологии за зачувување на здравјето“, ветува дека со блокирање на овој ген, ќе може значително да се продолжи младоста на клетките и да се спречат болестите поврзани со возраста. За овој амбициозен проект е задолжен Институтот за биологија на стареење и медицина.
„Блокадата на генот RAGE може да ја продолжи младоста на клетката. Нашата цел е првиот лек во светот кој целно го блокира овој рецептор, користејќи ги најнапредните генетски технологии“, објасни Секирински на конференцијата во Саранск.
© Vecer.mk, правата за текстот се на редакцијата
