Нашата планета е полна со чуда – фасцинантни, зачудувачки и честопати целосно неистражени. И додека многумина од нас сонуваат да патуваат на егзотични дестинации, постојат места кои се едноставно забранети. Не поради законот, туку поради самата природа, која ги направила убави, но во исто време и смртоносни. Ова се места што не може (или не смее) да се посетат • и со добра причина.
Зона на смртта, Монт Еверест – Непал и Тибет
Надморска височина: над 8.000 метри
На висина каде што дури ни хеликоптер не може да лета, телото почнува да се исклучува. Оваа зона, позната како „зона на смртта“ на Монт Еверест, се наоѓа над 8.000 метри надморска височина, каде што нивото на кислород паѓа на една третина од она на морското ниво. Екстремните температури, тешката висинска болест и неможноста за брза помош го прават ова подрачје најопасното место за планинарите. Иако многумина се обидуваат да стигнат до врвот на светот, многумина никогаш не се враќаат – телата на многу алпинисти сè уште лежат на патеката, замрзнати и недопрени.
Островот Сентинел – Бенгалски Залив, Индија
Дом на изолираното племе Сентинелци
Островот Сентинел е едно од последните места на планетата каде што модерната цивилизација сè уште не стапнала. Неговите жители – Сентинелците – живеат во целосна изолација илјадници години. Секој обид за контакт завршува трагично, бидејќи племето отфрла какво било надворешно влијание, честопати насилно. Пред неколку недели, еден патник се обидел да стигне до островот и да им донесе кока-кола, но веднаш бил уапсен. Индиската влада со закон го забрани пристапот до островот, со цел да се заштити и племето – кое нема имунитет на современите болести – и потенцијалните посетители, бидејќи секое пристигнување се смета за обид за напад. Едно е сигурно: никој не доаѓа во Сентинел и си заминува жив.
Змиски остров – Илха да Кеимада Гранде, Бразил
Број на змии: се проценува дека има до 5 змии на квадратен метар
На прв поглед, тропски рај. Всушност, тоа е кошмар од кој нема излез. Овој остров е дом на една од најсмртоносните змии во светот – златната копјеста змија (Bothrops insularis), чиј отров може да го стопи човечкото месо. Поради екстремната концентрација на овие змии, бразилската влада забрани посети на островот, освен за ретки научни експедиции. Овој дел од светот останува недостапен за туристите, бидејќи дури и кратката прошетка може да биде последна.
Езерото Натрон – Танзанија
Температура: до 60°C, pH: над 10
На границата помеѓу соништата и кошмарите се наоѓа езерото Натрон – бизарно, црвеникаво езеро чија вода има висока алкалност поради натриум карбонат. Секое живо суштество што се осмелува да ја допре неговата површина – птица, инсект или цицач – може да се мумифицира. Иако изгледа како нешто од бајка, ова езеро е практично стапица на смртта. Фотографиите од животни кои се „скаменети“ изгледаат како уметничка изведба, но всушност се ужасен потсетник за силата на природата.
Долина на смртта – Калифорнија, САД
Највисока измерена температура: 56,7°C
Во срцето на Калифорнија се наоѓа Долината на смртта, најжешкото место на Земјата. Во лето, температурата често надминува 50°C, а површината на земјата може да достигне неверојатни 93°C. Без вода, сенка и заштита, едно лице не може долго да преживее тука. На туристите им е дозволено да посетат некои делови од овој национален парк, но подлабоките зони и летните периоди претставуваат реална опасност по животот. Иронично, токму поради своето име и екстремните услови, ова место привлекува најмногу авантуристи.
Вулканот Ерта Але – Етиопија
Едно од ретките постојани езера од лава.
Во срцето на етиопската пустина Данакил се наоѓа Ерта Але, активен штитест вулкан познат по своите постојани езера од лава. Температурата на лавата надминува 1.200°C, а отровните гасови – вклучувајќи го и сулфур диоксидот – ја прават еден од најнепристапните вулкански системи во светот. Само ретки и обучени истражувачи успеваат да се приближат до овој природен феномен, но дури и тие го прават тоа со голем ризик.
Чернобил, Припјат Украина
Катастрофа, 1986 година
Нуклеарната катастрофа што се случи во Чернобил засекогаш го промени концептот на „забранета зона“. Градот Припјат, некогаш дом на 50.000 луѓе, денес е град на духови, заробен во времето. Иако дел од зоната се користи за тури со водич, во срцето на реакторот, како и во длабочините на Црвената шума, човечка нога не би смеела да стапне уште илјадници години. Високите нивоа на зрачење ги прават овие делови не само недостапни, туку и смртоносни.
© Vecer.mk, правата за текстот се на редакцијата
