Оксана Воеводина, поранешна Мис Москва, се најде во центарот на вниманието на светот во 2018 година кога се омажи за тогашниот крал на Малезија, Мухамед V. Нивната врска, која многумина ја споредуваа со бајка, заврши ненадејно само една година подоцна – со развод што отвори врата за бројни шпекулации, обвинувања и медиумски контроверзии.
Бракот, кој резултираше со раѓањето на нивниот син Леон, се распадна откако султанот упатил сериозни обвинувања против Оксана, тврдејќи дека таа му била неверна и дека детето можеби не е негово. Сепак, другата страна од приказната пристигна од Русија. Според блиската пријателка на Оксана, која разговарала со порталот „Ег.ру“, таа била целосно посветена на врската, во која влегла искрено и со убедување дека е единствената жена во животот на кралот.
Се вели дека живееле заедно со години пред да го кажат судбоносното „Да“, но нејзиниот свет почнал да се распаѓа кога дознала дека Мухамед V одржува паралелна врска со друга жена. Шокирана од откритието, Оксана, според истиот извор, била таа што го иницирала разводот.
Нивната приказна не останала без последици – Мухамед V абдицирал од престолот, што предизвикало бурни реакции во Малезија. Многу граѓани никогаш не му простиле што се откажал од своите кралски должности поради бракот со жена од странство.
По разводот, Оксана одлучила да се повлече од јавноста. Таа се вратила во Русија, а потоа започнала нов живот во Лондон, далеку од кралските протоколи. Денес, таа се занимава со недвижности, посветена е на здрав начин на живот, обука и одгледување на својот син, без финансиска поддршка од нејзиниот поранешен сопруг.
Во ретките јавни појавувања, таа јасно става до знаење дека не сака луѓето да ја паметат по нејзиното минато.
„Во деловната средина, речиси никој не знае која бев порано или дека имам стотици илјади следбеници на Инстаграм. Тоа не ми е важно. Не барам сожалување – градам нова приказна, според мои услови“, рече таа во едно интервју.
© Vecer.mk, правата за текстот се на редакцијата
