Здравствените институции ширум Европа предупредуваат за т.н. „парацетамол предизвик“, популарен на социјалните мрежи, кој ги поттикнува тинејџерите да земаат ризични количини на овој лек.
Стручњаците истакнуваат дека ваквите „игри“ можат сериозно да го загрозат здравјето, пренесува Еуроњус.
Први спомнувања уште во 2015 година
Според извештаи на здравствените власти, тинејџерите наводно учествуваат во онлајн предизвик за да видат кој може да внесе најголема количина парацетамол.
Првите спомнувања датираат уште од 2015 година, но пребарувањето на терминот „paracetamol challenge“ на мрежите открива малку докази дека младите активно учествуваат.
Повеќето содржини поврзани со темата доаѓаат од здравствени работници или медиумски извори кои предупредуваат за опасностите.
Предупредување за ризик од предозирање
Сепак, болницата Centre EpiCURA во Белгија потврди дека во февруари примила три пациенти поради предозирање со парацетамол, бидејќи „учествувале во предизвик на социјалните мрежи“.
Тамошната Федерална агенција за лекови и здравствени производи издаде предупредување на 6 февруари за ризикот од предозирање. Се наведува дека парацетамолот нема психоактивно дејство, дури ни во високи дози.
И други земји пријавуваат тренд на зголемен број случаи на предозирање.
„Разговарајте со своите деца, насочувајте ги како да ја користат технологијата и бидете внимателни на предупредувачки знаци, како повраќање, болки во стомакот или прекумерна поспаност“, порачаа претставници на Regional Universitario de Málaga.
„Сериозна и неповратна штета“
Директорката на Финската агенција за лекови, Пија Вуорела, ја нагласува важноста на разбирањето на ризиците поврзани со лековите и ги повикува возрасните да разговараат со децата за опасностите.
Во Португалија, Редот на фармацевти предупредува дека оваа практика претставува „сериозен здравствен ризик“, нагласувајќи дека токсичноста на парацетамолот може да се појави пред да се појават клиничките симптоми.
„Предозирањето може да предизвика сериозно и неповратно оштетување на црниот дроб, кое може да напредува до акутна црнодробна инсуфициенција, потреба од трансплантација и, во екстремни случаи, смрт. Во ретки случаи, може да се појави и оштетување на бубрезите, особено со долготрајна употреба и/или прекумерно внесување на лекот“, се наведува во него.
Парацетамолот е еден од најчесто користените лекови против болки и средства за намалување на температурата поради неговите аналгетски и антипиретични својства. Лекот е лесно достапен и, кога се користи како што препорачуваат здравствените власти, обично е безбеден.
© Vecer.mk, правата за текстот се на редакцијата
