Сè повеќе млади во последните години купуваат Библија и отворено зборуваат за верата. Она што до неодамна изгледаше како исклучок, денес сè почесто наликува на тренд. Податоците за продажба, истражувањата за религиозноста и теренските согледувања укажуваат дека дел од генерацијата З се свртува кон класичните верски текстови во потрага по смисла, стабилност и одговори.
Продажбата на Библијата на рекордно ниво
Податоците на компанијата Nielsen BookScan покажуваат дека продажбата на Библии во Обединето Кралство во 2025 година достигнала највисоко ниво откако се следат овие податоци. Годишната продажба е повеќе од двојно зголемена во споредба со 2019 година, додека бројот на продадени примероци во последните пет години пораснал за 106 проценти. Станува збор за поединечни купувања, а не за институционални нарачки.
Иако нема детална демографска анализа на сите купувачи, набљудувањата на книжарниците и црковните организации сугерираат дека голем дел од растот доаѓа од помладата популација. Според податоците на Библиско друштво, младите на возраст од 18 до 24 години се меѓу најредовните читатели на Светото писмо.
Интересно е што, и покрај тоа што пораснале со дигитална технологија, многумина и натаму посегнуваат по печатени изданија речиси подеднакво често како и по апликации.
Религијата повторно во центарот на културната сцена
Религијата истовремено повторно се појавува во популарната култура – од музика до мода и дизајн на ентериери. Естетиката на сакралното, симболиката и духовните мотиви повеќе не се табу, туку дел од јавниот дискурс.
Но зад естетиката, се чини, стои нешто подлабоко. И Црквата на Англија и Католичкат црква бележат пораст на возрасни кои пристапуваат кон крштевање и миропомазание. Истражувањата покажуваат дека бројот на млади кои барем еднаш месечно посетуваат црква значително се зголемил во споредба со периодот пред неколку години.
Потрага по смисла во несигурен свет
Лесно е да се разбере зошто дел од помладата генерација може да се чувствува изгубено. Војни, геополитичка нестабилност, климатски промени, економска несигурност и забрзан развој на вештачката интелигенција создаваат чувство на трајна неизвесност, пишува The Independent.
Жедта за подлабока смисла е разбирлив одговор на таквата реалност. Таа не е ограничена исклучиво на христијанството. Забележан е и пораст на млади кои се идентификуваат како „духовни“, но не се врзуваат за конкретна религија, туку се свртуваат кон астрологија, нумерологија и други облици на лична духовност. Истражувањата покажуваат дека значителен дел од генерацијата З е отворен кон идејата за „повисока сила“, дури и кога не се изјаснува како религиозен.
Но паралелно со овој тренд се појавуваат и знаци на враќање кон класичните верски текстови. За време на финалето на годинашната Дора, пејачот Марко Кутлиќ привлече внимание во зелената соба бидејќи, наместо да се дружи со останатите натпреварувачи, читаше книга – духовниот класик „Наследувај го Христос“ од Тома Кемписки, едно од највлијателните дела на христијанската духовност.
Таквите сцени сугерираат дека дел од помладата генерација не останува само на општа духовност или естетска фасцинација со религијата, туку посегнува по текстови што со векови ја обликуваат христијанската мисла.
Од нов атеизам до нова отвореност
На почетокот на 21 век силно влијание имаше т.н. „нов атеизам“, кој религијата ја претставуваше како реликт од минатото. Во многу западни општества верата стана приватна работа, а јавното истакнување на религиозноста често предизвикуваше непријатност.
Денес, во 2026 година, тонот на јавната расправа изгледа поинаку. Има сè помалку иронија, а сè повеќе љубопитност. Младите кои зборуваат за верата повеќе не се доживуваат нужно како исклучок или провокација.
Истовремено, истражувањата покажуваат дека младите христијани често демонстрираат силно просоцијално однесување – од волонтирање до активно учество во локалните заедници. За многумина верата не е само идентитет, туку и рамка за конкретно делување.
Повеќе од тренд
Секако, дел од интересот може да биде естетски или минлив. Но дигиталните податоци покажуваат и пораст на реален ангажман. Најпопуларната библиска апликација во светот неодамна надмина една милијарда преземања, а се бележи и раст на редовната употреба.
Сето тоа упатува на можноста дека не станува збор само за минлива мода, туку за подлабока промена. Во време кога многумина се чувствуваат несигурно и преоптоварено, враќањето кон текстови што нудат јасни морални рамки, одговорност и смисла може да делува како стабилна потпора.
Дали станува збор за трајна обнова или само за една фаза во цикличните промени на општествените ставови, ќе покаже времето. Но едно е јасно: интересот на младите за Библијата и христијанската традиција денес е повидлив отколку пред десет години.
© Vecer.mk, правата за текстот се на редакцијата
