Си Џинпинг е претседател на најнаселената земја во светот, но колку и да е голема и развиена, неговата ќерка во еден момент ја бараше среќата далеку од Кина.
Генералниот секретар на Комунистичката партија на Кина со неговата сопруга и поранешна пејачка Пенг Лијуан имаат само едно дете, ќерката Ши Мингзе, која се споменува во американските медиуми овие денови во екот на плановите на Трамп да им го отежни влезот на странските студенти на престижни колеџи.
Државниот секретар на САД, Марко Рубио, зборуваше за можноста за одземање на визите за кинеските студенти, а крајнодесничарката Лаура Лумер повика ќерката на Си Џинпинг да биде депортирана.
Ши Мингзе сè уште не се огласила и води тивок и осамен живот без изложеност, па затоа не треба да очекуваме таа да ги коментира овие изјави.
Која е ќерката на Си Џинпинг?
Ќерката на Џинпинг е родена на 25 јуни 1992 година во Фуџоу и е единствено дете на кинескиот политичар. Поради тоа колку многу се труди да ја зачува својата приватност, не се знае многу за Ши, но се знае дека посетувала училиште за странски јазици во Хангжу.
Потоа студирала на Универзитетот Џеџијанг една година, а во 2010 година се запишала на Харвард. Не се познати многу детали за образованието на ќерката на кинескиот претседател во Америка, но медиумите објавија дека Ши Мингзе студира под псевдоним и се обидува да не привлекува внимание.
Според непотврдени извештаи во тајванскиот печат, Ши била чувана од телохранители 24 часа на ден, со помош на ФБИ. Порталот WantChinaTimes еднаш ја опиша како „ненаметлива и опуштена девојка, која меѓу своите хобија вклучува читање и мода“.
Познато е дека таа волонтирала една недела по земјотресот во Сечуан во 2008 година, а својот прв јавен настап со своите родители го направила во 2013 година, кога Си Џинпинг и неговото семејство ги поздравиле мештаните во селото Лиангџијахе за кинеската Нова Година.
Дипломирала во 2014 година со диплома по психологија и се верува дека се вратила во Пекинг, како што објави „Њујоркер“ во 2015 година.
Сепак, како што пишува „Њузвик“, десничарската активистка Лаура Лумер тврди дека Ши Мингзе останала во Америка, денес живее во Масачусетс, па дури и е чувана од Кинеската народноослободителна армија и бара нејзина депортација.
© Vecer.mk, правата за текстот се на редакцијата
