Мистеријата околу исчезнувањето на Стивен Гарсија добива застрашувачки размери по откритието дека тој не е единствената жртва со ваков профил.
Списокот на мистериозни исчезнувања и смртни случаи на лица поврзани со американските нуклеарни и вселенски програми продолжува да расте, пренесува „Daily Mail“. Последниот случај кој ја вознемири јавноста е Стивен Гарсија (48), владин изведувач со највисок безбедносен сертификат и пристап до најчуваните нуклеарни постројки во САД.
Гарсија последен пат е виден на 28 август 2025 година како го напушта својот дом во Ново Мексико, облечен во маскирна маица и шорцеви, носејќи со себе само пиштол. Иако полицијата шпекулира дека тој „може да биде опасен за себе“, извори блиски до истрагата за Daily Mail категорично ја отфрлаат можноста за самоубиство, опишувајќи го како исклучително стабилна личност. Најсилната теорија во моментов е дека Гарсија станал мета на странски разузнавачки служби.
Гарсија работел на висока раководна позиција во Кампусот за национална безбедност во Канзас Сити (KCNSC) во Албакерки – објект одговорен за производство на над 80% од ненуклеарните компоненти за американскиот арсенал. По неговото исчезнување, сите негови компјутери и комуникации биле прегледани, но не е пронајдена ниту една трага која би ги објаснила мотивите.
Ова е десетти случај во последните неколку години на мистериозна смрт или исчезнување на експерти од овој сектор. Особено загрижувачки е што дури четири лица исчезнале на идентичен начин: пеш, без телефон или паричник, носејќи само оружје.
Мистеријата околу исчезнувањето на Стивен Гарсија добива застрашувачки размери по откритието дека тој не е единствената жртва со ваков профил. Во текот на 2025 година, под идентични околности исчезнаа и Ентони Чавез (79) и Мелиса Касијас (54), двајцата длабоко поврзани со Националната лабораторија „Лос Аламос“ – лулката на американското нуклеарно оружје. Чавез бил долгогодишен научник во лабораторијата, додека Касијас работела како административен асистент со највисоки безбедносни дозволи.
Клучната алка која ги поврзува сите исчезнати е пензионираниот генерал на воздухопловните сили, Вилијам Нил МекКасланд (68). Генералот МекКасланд исчезна на 27 февруари 2026 година во Албакерки на речиси идентичен начин како и Гарсија: го напуштил домот пеш, носејќи само револвер калибар .38, без телефон, очила или какви било лични предмети.
МекКасланд не бил обичен офицер. Како поранешен командант на Истражувачката лабораторија на воздухопловните сили (AFRL), тој директно ги надгледувал најчувствителните истражувања во базата Киртланд. Извори тврдат дека генералот имал детален увид во технологијата и производните погони во Албакерки каде што работел и Гарсија. Оваа мрежа на исчезнувања сугерира дека некој систематски ги елиминира или киднапира луѓето кои ги поседуваат најчуваните тајни за американската воздушна и нуклеарна доминација.
© Vecer.mk, правата за текстот се на редакцијата
