Три едноставни, но моќни совети за среќен брак

Децениите брак донесуваат лекции што младенците често ги занемаруваат. Љубовта и страста се важни, но долгите, среќни бракови се градат врз разбирање, пријателство и споделени вредности. Професорот Карл Пилемер разговараше со стотици постари Американци и откри три едноставни, но моќни совети што стојат зад нивните децении среќа.

Не очекувајте вашиот партнер да се промени

Една од најголемите заблуди е верувањето дека вашиот партнер ќе се промени по бракот. Постарите јасно предупредуваат дека луѓето ретко се менуваат и дека влегувањето во брак со тоа очекување речиси сигурно води до разочарување. Ако има некоја особина кај вашиот иден сопруг или сопруга што ве мачи, не очекувајте таа да исчезне само затоа што сте во брак. Напротив, може да стане уште поизразена со текот на времето.

„Како што ми рече живописно 80-годишната Роузи Еберле, која е среќно мажена 56 години, нема смисла да се залажувате себеси дека можете да промените некого, бидејќи не можете. Луѓето остануваат такви какви што се, па затоа е помудро да го прифатите вашиот партнер во целост или воопшто да не се венчате. Идејата дека љубовта или заедничкото живеење ќе ја трансформираат личноста на друга личност создава фрустрација и води кон дисхармонија“, нагласи професорот Карл Пилемер.

Венчајте се со некој што е сличен на вас

Спротивностите може да се привлекуваат, но на долг рок тие носат повеќе конфликт отколку хармонија. Постарите парови речиси едногласно велат дека сличностите се основа на среќен и траен брак. Партнерите кои ги делат истите основни животни вредности, ставови и цели имаат многу поголеми шанси да изградат стабилна врска. Ова е особено важно во клучните области од животот, како што се финансиите, воспитувањето деца и моралните принципи.

„Постарите луѓе велат: ако партнерите не се согласат за основните вредности, дури и најмалите проблеми лесно можат да ескалираат во големи конфликти. Една жена, во брак 58 години, нагласи дека токму споделените вредности овозможиле мирен живот без непотребни конфликти. Тие лесно донесувале одлуки затоа што нивните цели биле усогласени – двајцата верувале во образованието, сакале да бидат одговорни со финансиите и да ги воспитуваат своите деца да станат добри луѓе“, истакнува Пилемер.

Пријателството е исто толку важно како и љубовта

Многу парови со долг брак нагласуваат дека нивната најголема сила била тоа што се венчале со својот најдобар пријател. Љубовта и страста се силни темели, но се менуваат со текот на времето. Она што останува и го држи бракот заедно со децении е пријателството – способноста да уживате во меѓусебното друштво, да се смеете, да споделувате интереси и отворено да разговарате, исто како со вашиот најдраг пријател.

Г-ѓа Пати Банас, учесничка во студијата, призна дека вистинската среќа ја пронашла само во својот втор брак и нагласи: „Прво, осигурајте се дека сте навистина добри пријатели. Романтиката е убава, но не трае. Она што останува е пријателството.“