Италијанскиот регулатор AGCM започна истрага против Booking поради сомневања дека приоритетните партнерски програми влијаат врз рангирањето на сместувањата и ги заведуваат потрошувачите со цел да добијат повисоки провизии на платформата.
Италијанскиот антимонополски регулатор објави дека започнал истрага за да утврди дали дигиталната платформа Booking.com, преку начинот на кој ги рангира и промовира изнајмувачите, може да ги заведува потрошувачите со цел да добие повисоки провизии.
Истрагата се фокусира на „Програмата за приоритетни партнери“ и „Програмата за приоритетни партнери плус“, кои се дел од понудата на платформата за изнајмувачите.
Според регулаторот AGCM, Booking.com им обезбедува на корисниците на овие програми поголема видливост во резултатите од пребарувањето, дополнително ги истакнува визуелно и ја нагласува нивната „вредност за парите“ и квалитетот на услугата. Сепак, регулаторот проценува дека изборот на партнери во голема мера се базира на износот на провизијата што ја плаќаат на платформата, а не нужно на квалитетот на сместувањето.
Сомневање за измамнички практики
Регулаторите предупредуваат дека таков систем може да ги наведе корисниците да веруваат дека овие сместувања нудат подобар сооднос цена-квалитет од објектите што не се дел од програмата.
Во некои случаи, ова може да доведе до тоа корисниците да резервираат поскап смештај отколку што инаку би избрале, според AGCM.
Исто така, беше објавено дека италијанските финансиски инспектори, заедно со регулаторот, ги претресле канцелариите на Booking.com во Италија.
Здружението за заштита на потрошувачите Codacons го поздрави започнувањето на истрагата, нагласувајќи дека корисниците имаат право на целосна транспарентност при резервација преку интернет.
„Нагласувањето на квалитетот, цената и услугата без објективни критериуми, со цел да се добие поголема провизија, е измама што може да доведе до финансиска штета и погрешни одлуки на потрошувачите“, наведува Codacons.
Здружението дополнително предупредува дека околу 70 проценти од хотелските резервации во Италија се прават преку онлајн платформи, додека дури 42 проценти од дигиталните резервации се прават на Booking.com.
© Vecer.mk, правата за текстот се на редакцијата
