Истражувањата на експертите покажуваат дека бројот на зборови што се зборуваат дневно се намалил за 28 проценти од 2005 до 2019 година, а сега ситуацијата е веројатно уште полоша.
Според нова студија на научници од Универзитетот во Мисури-Канзас Сити и Универзитетот во Аризона, луѓето денес зборуваат помалку од кога било досега.
Поконкретно, тие наведуваат дека помеѓу 2005 и 2019 година, бројот на зборови што ги кажуваме на друго лице се намалил за речиси 28 проценти, а целата ситуација веројатно се влошила уште повеќе по пандемијата.
Како што пишува „Волстрит џурнал“, научниците го анализирале просечниот број на зборови што ги кажуваме (16.632 во 2005 година) врз основа на 22 студии во кои повеќе од 2.000 луѓе снимиле аудио снимки од нивниот секојдневен живот. Како што нарачувањето преку апликации станало вообичаено, испраќањето пораки се зголемило, а животот се префрлил сè повеќе на интернет, бројот на зборови што се зборувале значително се намалил. До 2019 година, тој изнесувал околу 11.900 зборови дневно.
Истражувачите, исто така, откриле дека помладите луѓе се малку поподложни на овој тренд.
Луѓето под 25 години изговараат 451 збор помалку дневно, додека оние над 25 години изговараат 314 зборови помалку. Во просек, бројот на изговорени зборови се намалил за 338 годишно. Доколку тој тренд продолжи, денес би можеле да изговараме помалку од 10.000 зборови дневно.
Ваквиот пад на комуникацијата, предупредуваат авторите на истражувањето, би можел да има пошироки последици. Покрај зголемувањето на чувството на осаменост, сè повеќе се истакнува слабеењето на основните комуникациски вештини, како што е водење разговор без прекинување на соговорникот или одржување на вниманието во интеракцијата лице в лице.
© Vecer.mk, правата за текстот се на редакцијата
