Судницата во Оукленд, Калифорнија, стана епицентар на најзначајната правна битка во светот на вештачката интелигенција. Илон Маск, милијардерот кој стои зад „Tesla“ и „SpaceX“, застана на клупата за сведоци во процесот против неговите поранешни партнери од „OpenAI“. Ова не е само судир за пари; ова е судење за етиката, иднината на човештвото и за тоа дали една хуманитарна визија смее да биде продадена на најдобриот понудувач, пренесува „Асошиејтед прес“.
Обвинението: Хуманоста претворена во машина за профит
Адвокатот на Маск, Стивен Моло, го отвори процесот со остар напад врз Сем Алтман и Грег Брокман. Тој тврди дека водечките луѓе на „OpenAI“, во соработка со гигантот „Microsoft“, извршиле корпоративно „киднапирање“. Првичната идеја, во која Маск инвестираше милиони, беше создавање непрофитна организација за безбеден и отворен развој на вештачката интелигенција (AI) достапна за сите. Денес, „OpenAI“ вреди неверојатни 783,5 милијарди евра, бројка која според Маск е доказ за прекршување на секое дадено ветување кон јавноста.
„Ова е всушност многу едноставно, не е во ред да се украде добротворна установа. Сакаат да го направат случајот сложен, но суштината е предавство на мисијата“, дециден беше Маск за време на своето сведочење.
Одбраната: „Маск тужи бидејќи не го доби тоа што го сакаше“
Адвокатите на „OpenAI“ не останаа должни. Вилијам Савит тврди дека алтруизмот на Маск е само маска за повреденото его. Според него, вистинската причина за тужбата е неуспешниот обид на Маск во 2017 година да ја преземе целосната контрола врз „OpenAI“ и да ја спои со „Tesla“. Според одбраната, Маск барал мнозински удел во профитната верзија на компанијата, а кога бил одбиен, решил да се пресмета преку судот.
Вештачката интелигенција како „паметно дете“
Маск, кој е познат по своите работни недели од по 100 часа, се присети на почетоците и конфликтот со коосновачот на „Google“, Лари Пејџ. Додека Пејџ се фокусирал само на брзиот напредок, Маск инсистирал на опстанокот на човештвото. Тој упати морничаво предупредување: вештачката интелигенција би можела да ја надмине човечката интелигенција веќе следната година.
„Мораме да ја воспитуваме вештачката интелигенција како многу паметно дете. Мораме да ѝ всадиме вредности како чесност и интегритет, наместо да ја препуштиме на корпоративниот профит“, истакна тој.
© Vecer.mk, правата за текстот се на редакцијата
