Сè поголем број швајцарски граѓани се соочуваат со финансиски тешкотии и покрај тоа што живеат во една од најбогатите земји во светот.
Високите кирии, зголемените трошоци за здравствено осигурување и стагнацијата на платите доведоа до тоа многумина повеќе да не можат да штедат, а некои едвај ги покриваат основните трошоци за живот.
Според анкетата на швајцарскиот весник „Блик“, во која учествувале повеќе од 7.000 читатели, речиси една третина од испитаниците имаат помалку од 500 франци месечно откако ќе ги платат сите фиксни трошоци. 13 проценти од нив немаат преостанат износ, додека нешто повеќе од една четвртина успеваат да заштедат повеќе од 3.000 франци месечно.
Граѓаните сè повеќе отворено зборуваат за проблемите. Матијас Рајман наведува дека, и покрај неговото постојано вработување и дополнителната работа на неговиот партнер, со три деца, му е сè потешко да ги покрие трошоците бидејќи цените растат, а платите стагнираат. Енгин Харун истакнува дека бил принуден да работи дополнително за да ги плати даноците и здравственото осигурување.
Особено се погодени оние со нарушено здравје. Миријам Шенк, која прима инвалидска пензија и додатоци, вели дека откако ги платила основните трошоци, ѝ остануваат многу малку пари и дека понекогаш не може да си дозволи ниту редовни оброци.
Се повеќе луѓе бараат решение надвор од земјата. Пензионерот Роланд Зауг се преселил во Шпанија бидејќи неговата пензија од 1.900 франци повеќе не била доволна за живеење во Швајцарија. Слична одлука донел и друг граѓанин, кој ја напуштил земјата пред девет години поради високите трошоци за живот.
Додека некои граѓани сè уште успеваат да штедат, има сè помалку и помалку од нив. Зголемувањето на цените на домувањето и здравственото осигурување најмногу ги погодува домаќинствата со ниски и средни приходи, а барањата за итни мерки за спречување на понатамошно влошување на социјалната состојба се сè погласни.
© Vecer.mk, правата за текстот се на редакцијата
