Одењето е исклучително корисна физичка активност која, може да го намали ризикот од депресија, покачен крвен притисок, дијабетес, срцеви заболувања и други здравствени проблеми. Освен што е лесно достапно и не бара посебна опрема или посета на теретана, одењето претставува едноставен начин да останете физички активни. Сепак, неправилната техника може да доведе до сериозни проблеми со колената.
Како одењето може да ги оштети колената
Ако сакате со одење да ги постигнете вашите фитнес цели, важно е да ги избегнете овие лоши навики – во продолжение откриваме и зошто.
Предолго и премногу брзо одење
Ако нагло го зголемите интензитетот или растојанието, вашите колена нема да имаат време да се прилагодат на дополнителниот стрес. Тоа може да доведе до болни повреди поради преголемо оптоварување, како што се пателарен тендонит или синдром на илиотибијалната (IT) лента. Добро правило е да го зголемувате растојанието или интензитетот за околу 10-20% неделно. Ова им дозволува на зглобовите и околните мускули да се прилагодат. Правилните вежби или ортопедски влошки по мерка може да помогнат во корекција на одењето и заштита на колената.
Одење без јакнење на потпорните мускули
Ако мускулите околу колената се слаби, тешко ќе ги поддржат колената, особено ако одењето е единствената форма на вежбање. Поради тоа, зглобовите се подложни на преголема употреба и повреди. Вклучувањето вежби за квадрицепсите, лигаментите на колената и листовите е неопходно за здравјето и стабилноста на колената. Чучњеви, испади наназад и настрана, степови, подигнување на прсти, мостови со глутеус и екстензии на квадрицепсот во седење ја зголемуваат стабилноста и силата на колената.
Слабост и неактивност на мускулите на колкот
Силата на колкот и глутеусот е неопходна за правилно одење. Ако мускулите на колкот и задникот се слаби, колената можат прекумерно да го надоместат недостатокот на поддршка. Со тек на време тоа може да доведе до мускулна нерамнотежа, повреди од прекумерна употреба и болка во зглобовите. Вежби како мртво дигање, мостови, вежби со ластици и странично подигнување на нозете можат да ги зајакнат колковите и да ја намалат оваа нерамнотежа.
Износени/неудобни чевли
Со текот на времето, чевлите ја губат својата амортизација и поддршка. Носењето износени чевли може да ја наруши природната механика на вашите стапала и да предизвика проблеми со порамнувањето поради слаба амортизација. Одењето во неудобни или неадекватни чевли може да предизвика состојби како плантарен фасциитис, стрес на зглобовите и тендинитис. Затоа е важно да се инвестира во квалитетни чевли за одење кои обезбедуваат добра поддршка на сводот на стапалото, удобност и соодветен ѓон прилагоден на вашиот стил на одење. Идеално е да ги менувате чевлите на секои 500-800 км или кога ќе забележите дека ѓонот е износен и нема поддршка.
Лошо држење
Лошото држење за време на одење може да ја наруши рамнотежата на телото и дополнително да ги оптовари зглобовите. Тоа може да вклучува премногу наведнување напред, грбно држење додека гледате во телефон или неправилно наведната карлица. Оваа неусогласеност може дополнително да ги оптовари колената, што со текот на времето доведува до болка во зглобовите. Стојте исправено со опуштени рамена и дозволете им на рацете природно да се движат додека чекорите. Држете ги градите и рамената подигнати. Можете да замислите балон кој го влече врвот на вашата глава за да одржите неутрална положба. Вежбањето на свесно држење за време на одењето ќе помогне во намалување на стресот на колената и ќе ја подобри ефикасноста на одењето.
© Vecer.mk, правата за текстот се на редакцијата
