Голем број германски компании нудат флексибилно работно време за да привлечат работници, се вели во извештајот објавен денеска од минхенскиот институт за економски истражувања ИФО и организацијата Рандстат.
Три четвртини од германските компании ја понудиле оваа поволност во огласите за вработување, се додава во извештајот.
Компаниите се соочуваат со недостиг на работна сила и квалификувани вработени на пазарот, па затоа треба да бидат привлечни за кандидатите, а флексибилното работно време е клучна предност, коментира Дарија Шалер, претставник на минхенскиот институт.
Големите компании нудат флексибилно работно време нешто почесто од малите фирми, при што особено се издвојуваат давателите на услуги - 78 проценти од нив и трговците на мало - 72 проценти.
Компаниите исто така се обидуваат да ги заинтересираат работниците за можности за понатамошна обука, што е поволност што ја нудат 85 проценти од големите и 58 проценти од малите компании.
На трето место се поволностите како превозен билет, можност за јадење во кафетеријата или пропусница за фитнес и други спортски активности.
Оваа опција ја нудат дури 89 отсто од големите компании, додека кај малите процентот е значително помал и изнесува само 37 отсто.
Само 11 отсто од компаниите во Германија во моментов нудат четиридневна работна недела, според веб-страницата на институтот во Минхен.
© Vecer.mk, правата за текстот се на редакцијата
