Трговските тарифи за увезените возила, објавени оваа недела од американскиот претседател Доналд Трамп, би можеле да доведат до голем пад на извозот на германски автомобили во САД, според пресметките на меѓународната сметководствена компанија Делоит.
Извозот на возила и автоделови од Германија во САД, каде автомобилскиот сектор е клучен столб на економијата, би можел да падне до 29 отсто, покажа анализата на Deloitte.
Тоа би одговарало на пад на продажбата од 8,2 милијарди евра (8,84 милијарди долари), соопшти германското седиште на Deloitte во Минхен.
Тарифите од 25 отсто стапуваат на сила на 3 април. Пресметките се базираат на податоците од Проектот за глобална анализа на трговијата, меѓународна истражувачка мрежа за анализа на трговските текови.
Севкупно, германските производители продале 1,3 милиони автомобили во САД минатата година, рече Харалд Проф, шеф на глобалната автомобилска пракса на Делоит.
Германските производители на автомобили кои веќе имаат фабрики во САД не можат едноставно да пренесат повеќе производство таму, тврди тој, бидејќи американските фабрики веќе работат со 70 отсто капацитет.
„Би биле неопходни значителни инвестиции во нови производствени капацитети“.
© Vecer.mk, правата за текстот се на редакцијата
