Ирската нискобуџетна авиокомпанија „Рајанер“ денес објави дека го намалила капацитетот на зимските летови до Берлин и други германски градови за 800.000 седишта поради спор со германската влада околу даноците за воздушен сообраќај и трошоците за пристап до аеродромите.
„Рајанер“ наводно откажал 24 рути до девет аеродроми, вклучувајќи го и Хамбург, додека летовите до Дортмунд, Дрезден и Лајпциг ќе продолжат да бидат суспендирани.
Компанијата ја повика германската влада да ги намали трошоците за контрола на воздушниот сообраќај, аеродромските даноци и безбедносните такси и ги посочи Шведска и Унгарија, каде што ваквите даноци се укинуваат, како позитивни примери, објави „Блумберг“.
„Многу е разочарувачки што новоизбраната германска влада веќе не успеа да го исполни своето ветување за намалување на регресивниот данок на воздушниот сообраќај и прекумерните трошоци што го оптоваруваат германскиот воздухопловен сектор“, истакна директорката за маркетинг на „Рајанер“, Дара Брејди.
Минатата година, „Рајанер“ веќе го намали капацитетот на три големи германски градови за 1,8 милиони седишта и го намали капацитетот на аеродромот Берлин-Бранденбург за 20 проценти.
© Vecer.mk, правата за текстот се на редакцијата
