Овој месец беше реализиран најдолгиот редовен лет во светот, кој траеше неверојатни 29 часа, поместувајќи ги границите на ултра долгите летови.
Од 4 декември, „Чајна Истерн ерлајнс“ сообраќа помеѓу Шангај и Буенос Аирес, со кратка станица во Окленд, со „Боинг 777-300ER“ со 316 седишта, двапати неделно и покрива околу 20.700 километри, слетувајќи на аеродромот Езеиза, близу до аргентинската престолнина.
Летот кон југ трае малку повеќе од 25 часа, додека враќањето во Кина, поради преовладувачките ветрови, трае околу 29 часа.
„Јужен коридор“ помеѓу три континенти
„Чајна Истерн“ го опиша својот нов лет како чекор кон создавање „Воздушен пат на свилата“ што ја поврзува Азија со Океанија и Јужна Америка.
Околу 55.000 кинески државјани живеат во Аргентина, што го прави овој пазар многу важен за компанијата.
Цените се движат од 1.320 до 1.950 евра во економска класа, до околу 4.200 евра во бизнис класа.
Компанијата вели дека новиот „јужен коридор“ ги поврзува спротивните краеви на Пацификот и ги подобрува опциите за патување помеѓу три континенти.
Кои се најдолгите летови во светот
Овој лет, исто така, покажува колку брзо расте бројот на ултра долги летови. Благодарение на полесните и поекономични авиони, авиокомпаниите сè повеќе воведуваат директни врски помеѓу оддалечените региони - дури, како што вели China Eastern, „антиподски“ дестинации.
Ова ново патување се приклучува на мала, но растечка група ултра долги рути што веќе се во функција, пишува Euronews.
Singapore Airlines досега го имаше најдолгиот директен лет во светот, помеѓу Сингапур и аеродромот JFK во Њујорк.
Летовите кон исток и повратните летови траат околу 18 часа и се управувани од ултра долг дострел Airbus A350 - авион што може да остане во воздух речиси 18.000 километри. Компанијата, исто така, нуди малку пократок лет од Сингапур до Њуарк.
Други авиокомпании, исто така, имаат рути што редовно надминуваат 15 часа. „Катар ервејс“ ги поврзува Доха и Окленд, додека „Квантас“ оперира со два големи ултра долги летови: Перт-Лондон „Хитроу“ и Мелбурн-Далас „Форт Ворт“.
Сите овие рути спаѓаат во категоријата ултра долги летови, дефинирани како летови што траат 16 часа или повеќе.
Нови долги линии во план
Наскоро, патниците на кои не им пречи да поминуваат многу време во воздух ќе можат да се впуштат во уште подолги патувања.
„Квантас“ планира да ги воведе своите рути „Проект Санрајз“ кон крајот на 2026 или 2027 година.
Користејќи специјално конфигуриран „Ербас А350-1000“ со дополнителни резервоари за гориво, „Квантас“ ќе нуди директни летови од Сиднеј до Лондон и од Сиднеј до Њујорк, со очекувани полетувања помеѓу 19:00 и 22:00 часот.
Испораката на авионот е планирана за октомври 2026 година, а се смета дека рутата Сиднеј-Лондон ќе биде првата што ќе биде лансирана.
Други долги линии се планирани за 2026 година, но веројатно е дека „Чајна Истерн“ сепак ќе биде единствената линија доволно долга за да гледате цела сезона од вашата омилена серија.
„Етихад“ ќе воведе нова линија Абу Даби-Шарлот во мај, проширувајќи ја својата мрежа во САД со летови близу 15 часа.
„Делта“ ќе ја лансира својата прва директна линија помеѓу Атланта и Ријад кон крајот на 2026 година.
Во меѓувреме, ирскиот „Ер Лингус“ ќе ја прошири својата трансатлантска мрежа со нова линија од Даблин до Рали Дарам, Јужна Каролина, додека „Бритиш ервејс“ додава дополнителни летови до Мајами и Бангкок, како и сезонски летови до Јамајка.
Што значат ултра долгите летови за климата?
Овој растечки тренд може да биде добра вест за ентузијастите за летање, но лоша вест за климата.
Еден интерконтинентален лет произведува повеќе јаглерод диоксид отколку што многу луѓе во светот испуштаат за цела година - и повеќе отколку што просечниот Европеец произведува за греење на својот дом и јадење - наведува организацијата „Stay Grounded“.
За споредба, патувањето со воз произведува до 70 пати помалку емисии отколку летањето на иста далечина.
© Vecer.mk, правата за текстот се на редакцијата
