Корисниците на интернет ширум светот пријавуваат масовни прекини во работата на платформите што користат услуги од „Cloudflare“, меѓу кои „Zoom“, „Canva“, „LinkedIn“ и „Down Detector“.
„Cloudflare“ обезбедува услуги за голем број познати сајтови, вклучувајќи ги „Discord“, „Notion“, „X“, „Spotify“, „Canva“, „GitHub“ и „Stack Overflow“.
Проблемите ги погодија и продажните платформи „Shopify“, „Etsy“, „Wayfair“, „H&M“, како и дел од медиумите, меѓу кои „Politico“, „Axios“, „BBC“ и други.
Дури и „Down Detector“, сајтот што ги следи дефектите на интернетот и апликациите, во моментов се соочува со потешкотии.
„Cloudflare“ е компанија која помага на речиси секоја петта интернет страница да го обезбеди и управува својот интернет-сообраќај. Многу платформи што сега се недостапни ги користат нивните сервери.
Кон крајот на ноември се случи сличен дефект кој ги погоди десетици сајтови што работат преку „Cloudflare“, поради што коосновачот и директор на компанијата Метју Принс се извини „за болката што му ја нанесовме на интернетот“, како што напиша на блог.
Тогаш прекинот беше предизвикан од пад на системот што ги штити сајтовите од DDoS-напади – обиди серверот да се преплави со сообраќај и да се онеспособи. Принс објасни дека тој инцидент не бил резултат на кибер-напад.
Сè уште не е познато што го предизвика денешниот прекин.
© Vecer.mk, правата за текстот се на редакцијата
