Рускиот претседател Владимир Путин денес изјави дека војната во Иран предизвикала глобална енергетска криза и предупреди дека производството на нафта кое зависи од транспортот преку Ормутскиот теснец наскоро би можело целосно да престане.
Путин уште еднаш стави до знаење дека Русија е подготвена да ја снабдува Европа со нафта и гас. Русија е втор најголем извозник на нафта во светот и има најголеми резерви на природен гас во светот.
Зборувајќи на состанок со владини претставници и лидери на водечките руски производители на нафта и гас, Путин рече дека Москва е подготвена повторно да соработува дури и со европски компании и клиенти.
„Руските компании треба да ја искористат моменталната ситуација на Блискиот Исток“
„Доколку одеднаш одлучат да се преориентираат и да ни обезбедат долгорочна соработка, ослободена од политички притисок, ние сме подготвени да соработуваме со Европејците. Сепак, ни требаат гаранции дека се подготвени и спремни да соработуваат и да обезбедат одржливост и стабилност“, рече Путин.
Тој додаде дека руските компании треба да ја искористат моменталната ситуација на Блискиот Исток, иако забележа дека порастот на цените веројатно ќе биде привремен по природа.
Цените на нафтата денес надминаа 100 долари за барел и достигнаа највисоко ниво од 2022 година, бидејќи Ормускиот теснец е ефикасно затворен поради војната со Иран.
© Vecer.mk, правата за текстот се на редакцијата
