Со војните во Украина и во други делови од светот, книгите за нарачки на германската индустрија за оружје и воена опрема станаа преполни и многу компании во индустријата планираат големи инвестиции во проширување на производството.
Најголемиот производител на оружје и опрема во Германија е „Рајнметал“. Концернот е исто така клучен снабдувач на Украина, а дел од трошоците ги покрива германската влада.
„Рајнметал“ инвестираше околу 100 милиони евра во изградба на нова фабрика во Северна Рајна-Вестфалија, за производство на компоненти на американскиот бомбардер „стелт“ Ф-35, проект на гигантската компанија „Локид Мартин“.
Тој објект започнува со работа во вторник, додека во исто време, во договор вреден 300 милиони евра, ја проширува својата најголема фабрика, во Долна Саксонија, каде што произведува муниција, и ќе произведува повеќе делови за Ф-35.
На крајот на март, „Рајнметал“ имаше нарачки во вредност од 62,6 милијарди евра во своето портфолио, вклучувајќи договори, рамковни спогодби и објавени зделки.
За споредба, на крајот на 2021 година и во пресрет на рускиот напад врз Украина, портфолиото тежеше 24,5 милијарди евра.
Приходите и профитот на компанијата исто така силно растат, а бројот на вработени треба да се зголеми за една четвртина во следните две години, на 40.000.
Од февруари 2022 година, вредноста на акциите на „Рајнметал“ се зголеми за околу 18 пати.
Во исто време, секторот на концернот за производство на делови за цивилни автомобили е во тешкотии, па се очекува „Рајнметал“ да префрли дел од работниците од тие фабрики во воено производство.
© Vecer.mk, правата за текстот се на редакцијата
