Норвешка веќе со години се обидува да го реши проблемот со еден од најопасните делови на својот брег, каде силните ветрови, високите бранови и непредвидливите морски струи редовно го загрозуваат поморскиот сообраќај кај полуостровот Стад.
Ова подрачје со децении се смета за една од најризичните рути, поради што властите планираат изградба на првиот бродски тунел во светот. Овој голем премин низ планина би им овозможил на бродовите безбедно патување, избегнувајќи го излезот на опасното отворено море.
Проектот познат како „Stad Ship Tunnel“ е замислен како тунел долг речиси километар и половина, издлабен низ карпа и доволно голем за низ него да минуваат товарни и патнички бродови со средна големина. Тунелот би ги поврзувал северниот и јужниот дел на полуостровот на неговото најтесно место, а сообраќајот би се одвивал под строга контрола со семафори и временски термини, слично како при слетување на авиони. Планирано е низ тунелот да минуваат до пет бродови на час со ограничена брзина. Најголемиот предизвик е самиот градежен зафат кој бара отстранување на три милиони кубни метри карпи преку сложени минирања и обликување на внатрешноста. Тунелот би имал висина од 50 метри и ширина од 36 метри, што е доволно за регионалните бродови кои превезуваат стока и патници.
Норвешка го смета овој проект за исклучително важен бидејќи нејзината економија силно се потпира на извозот на морска храна, каде лошите временски услови често предизвикуваат прекини во транспортот. Тунелот треба да овозможи предвидлива пловидба дури и во најтешките зимски месеци. Сепак, овој револуционерен потфат се соочува со сериозни финансиски проблеми. Поради инфлацијата и сложените геолошки услови, буџетот нагло порасна на околу 740 милиони евра, со што се надминаа претходно одобрените рамки од страна на парламентот.
Поради експлозијата на трошоците, норвешката влада минатата година дури предложи и запирање на проектот, но парламентот одлучи да продолжи со обидите за намалување на цената. Министерката за рибарство и океани, Маријан Сивертсен Нес, изјави дека иако најновите пресметки се нешто пониски од претходните, проектот сè уште не може да се реализира во рамките на сегашните финансиски граници. Реализацијата моментно е во фаза на чекање додека владата не го донесе конечниот избор меѓу големите градежни компании како „AF Gruppen“, „Eiffage“ и „Skanska“. Доколку тунелот конечно добие зелено светло, изградбата би траела меѓу четири и шест години, а првите бродови би можеле да поминат низ него на почетокот на следната деценија.
© Vecer.mk, правата за текстот се на редакцијата
