Американскиот суд го „ПОКОСИ“ Google со една реченица

На Google му е одбиено барањето поднесено до Врховниот суд на САД.

Во една реченица, Врховниот суд на САД го отфрли барањето на Google за привремено запирање на клучните мерки наметнати од понизок суд, кои наложуваат значајни промени во начинот на кој работи Google Play.

Пресудата на судијата Џејмс Донато од октомври минатата година наложува Google да им дозволи на конкурентските продавници за апликации пристап до целиот каталог на компанијата во рамките на системот Android, како и да дозволи инсталирање на алтернативни продавници преку Play.

Во својата жалба, Google се осврна на ризикот за безбедноста на корисниците, а компанијата тврди дека отворањето на Play Store за трети страни може да доведе до ширење на злонамерна, заведувачка или пиратска содржина.

Според планот, Google мора да се придржува до делумните промени до 22 октомври 2025 година, додека реформите во врска со интероперабилноста на продавниците за апликации ќе стапат на сила до јули 2026 година.

Компанијата вели дека ќе продолжи со судските постапки и ќе поднесе целосна жалба до Врховниот суд до 27 октомври, но конечната одлука сега останува неизвесна.

Од своја страна, Epic Games (креаторот на популарната игра Fortnite) го смета ова за значаен напредок во борбата за поголема слобода за програмерите и подобар избор за корисниците.