Енергетските последици од војната на Блискиот Исток ќе се чувствуваат долго време и Европската комисија (ЕК) подготвува пакет мерки за помош на граѓаните и компаниите, изјави комесарот за енергетика, Ден Јоргенсен. Тој додаде дека предлогот ќе вклучува намалување на даночните стапки за електрична енергија и тарифите за преносните мрежи.
„Не треба да имаме илузии дека последиците од оваа криза за енергетските пазари ќе бидат краткотрајни, бидејќи нема“, рече Јоргенсен на прес-конференцијата по виртуелниот состанок на министрите за енергетика на земјите-членки на ЕУ.
Јоргенсен презентираше податоци според кои цената на гасот во ЕУ се зголемила за околу 70 проценти од почетокот на конфликтот на Блискиот Исток, а на нафтата за 60 проценти. Дополнителни 14 милијарди евра се потрошени за еден месец за увоз на фосилни горива во ЕУ.
Комесарот ги повика членовите на Унијата да одговорат на енергетската криза на координиран начин и дека мерките мора да бидат насочени и привремени. Тој исто така истакна дека ЕУ не смее да заборави на својата долгорочна цел, постигнување целосна независност од увезените фосилни горива.
„Оваа криза уште еднаш ни покажува дека Европа се соочува со фундаментална ранливост на надворешни енергетски шокови, што е поврзано со нашата зависност од увоз на фосилни горива“, рече Јоргенсен.
„Енергетската независност е патот напред и е стратешки императив од економска и безбедносна гледна точка, не само поради климата“.
Во говор што потсетуваше на раните денови на пандемијата на коронавирусот, Јоргенсен рече дека Европа се соочува со „многу сериозна ситуација“ без крај на повидок.
„Дури и ако утре владее мир, нема да има враќање во нормала во догледна иднина“, рече тој.
Препораки за заштеда на гориво
„Колку повеќе нафта успеете да заштедите, особено дизел и авијациско гориво, толку подобро ќе бидеме сите“, рече Јоргенсен, потврдувајќи ги претходните медиумски извештаи дека Брисел сака Европејците да патуваат помалку.
Тој ги повика земјите-членки да ги следат советите на Меѓународната агенција за енергија, кои, рече тој, вклучуваат работа од дома каде што е можно, намалување на ограничувањето на брзината на автопатите за десет километри на час, охрабрување на јавниот превоз, воведување систем за пар-непар за приватни автомобили, охрабрување на споделување на транспортот и усвојување поекономични навики на возење.
На долг рок, тој ги повика земјите од ЕУ да ги удвојат напорите за изградба на нови обновливи извори на енергија.
„Ова мора да биде моментот кога конечно ќе ја свртиме ситуацијата и ќе станеме навистина енергетски независни“, истакна тој.
Цените скокнаа за 70 проценти
Коментарите на Јергенсен доаѓаат во време на растечки стравувања дека светот се соочува со голема енергетска криза што би можела да го надмине нафтениот шок од 1970-тите и да има глобални економски последици споредливи со пандемијата на коронавирусот.
Откако САД и Израел ги започнаа своите први напади врз Иран пред повеќе од еден месец, цените на нафтата и гасот се зголемија за дури 70 проценти, бидејќи една петтина од светските залихи на сурова нафта и течен природен гас се блокирани во Персискиот Залив.
Министри без конкретни предлози
Денешната средба на министрите заврши без конкретни предлози, но Јергенсен вети дека Комисијата ќе објави пакет мерки на ниво на целата Унија во блиска иднина.
Според луѓе запознаени со дискусиите, тие разговарале за државни субвенции, зголемување на уделот на обновливи извори и нуклеарна енергија со цел зајакнување на енергетската безбедност и поддршка на предлогот на Комисијата за поттикнување на биогоривата. Нордиските земји ја нагласија потребата од заштита на енергетската инфраструктура.
Очекувањата за конкретни потези пред состанокот беа ниски, според изјавите на неколку дипломати кои сакаа да останат анонимни. Целта, рекоа тие, беше да се координираат активностите.
© Vecer.mk, правата за текстот се на редакцијата
