Претседателот на Владата, Христијан Мицкоски, одговарајќи на новинарско прашање за прогресот на проектот Градски воз, изјави дека проектот е исклучително важен и дека првата фаза веќе е отпочната.
– Градски воз е исклучително важен проект за приградските населби и општини до центарот на главниот град. Проектот ќе се реализира во три фази. Првата фаза веќе е отпочната, со реконструкција на пругата и електрификација. Сообраќајот ќе се одвива со електрична локомотива и електричен воз. Вредноста на проектот е 360 милиони денари – истакна Мицкоски.
Премиерот нагласи дека со реализацијата на трите делници се очекува драстично да се намали користењето на патничките автомобили.
– Првата делница ќе минува од Зелениково преку Драчево, Лисиче, Кисела Вода, Аеродром до централната железничка станица во Скопје. Втората делница е од Миладиновци, Илинден, Маџари до централната станица, а третата делница од централната станица преку Скопје Север и Ѓорче до Волково. Очекуваме дека на овој начин значително ќе се растовари сообраќајот во Скопје, а голем број жители на општините околу градот и приградските населби ќе можат да ги користат овие линии. Тие ќе бидат брзи, удобни и практични, што ќе го намали користењето на приватните автомобили и ќе ја промовира употребата на Градскиот воз – рече премиерот Мицкоски.
© Vecer.mk, правата за текстот се на редакцијата
