Новиот дизајн на банкнотата од еврото повторно ја разгоре долгогодишната контроверзност меѓу Франција и Полска околу наследството на добитничката на Нобелова награда Марија Кири (родена Склодовска).
Родена во Варшава во 1867 година, Склодовска-Кири подоцна се преселила во Франција, каде што станала првата жена што освоила Нобелова награда кога ја добила наградата за физика со својот сопруг Пјер во 1903 година.
Осум години подоцна, познатата научничка ја освоила и Нобеловата награда за хемија, што ја прави единствената личност што освоила Нобелови награди во две различни научни дисциплини, пишува Вечерњи лист.
Таа користела различни верзии на своето презиме низ годините. За време на животот на нејзиниот сопруг, таа се потпишувала како Склодовска-Кири, но подоцна сè повеќе како М. Кири.
Нејзината лична историја повторно се најде во центарот на вниманието откако Европската централна банка (ЕЦБ) објави дека ќе воведе нова серија банкноти, на кои би можела да се појави Склодовска-Кири на банкнотата од 20 евра.
Во Полска, ЕЦБ е критикувана за начинот на кој нејзиното име е прикажано во дизајнот, каде што нејзиното полско моминско презиме е ставено во загради, објавува „Еуроњуз“.
Во Полска, оваа одлука предизвика бран незадоволство. За многу Полјаци, изоставувањето на моминското презиме на Нобеловката или замената на нејзиното полско презиме со француската верзија, не е само формално прашање, туку и симболично.
Тие го гледаат ова како потсетник за потценувањето на придонесот на Полска во европската историја.
Политичката димензија на спорот стана очигледна кога полските медиуми и коментатори забележаа дека други историски личности, вклучувајќи ги Мигел де Сервантес или Лудвиг ван Бетовен, ги задржале своите оригинални имиња во сите јазични верзии.
Како одговор на жалбите, ЕЦБ нагласи дека ја зема предвид сложеноста на проблемот.
„Консултираме различни историски и лингвистички извори за да ја утврдиме најсоодветната нотација“, рече портпаролот на ЕЦБ.
Деловниот формулар „Марија Кири (родена Склодовска)“ има за цел да го одрази двојниот идентитет на добитничката на Нобеловата награда, додаде тој.
© Vecer.mk, правата за текстот се на редакцијата
