Државната компанија за цивилно воздухопловство на Авганистан, „Аријана Афган ерлајнс“, увезе два нови мотори за авиони во вредност од речиси 4,7 милиони американски долари од добавувачи од Србија и Турција, објавија авганистанските и медиумите специјализирани во секторот за воздухопловна индустрија.
Во соопштението објавено во вторник, компанијата соопшти дека моторите се купени во согласност со меѓународните технички стандарди и се доставени во Кабул со чартер карго лет. Планирано е тие да се инсталираат на авиони „Боинг 737“ и „Ербас А310“ за да се обезбеди побезбедно, постабилно и поредовно летање, објавува „Кабул Трибјун“.
Бахт-ур-Рахман Шарафат, шефот на „Аријана Афган ерлајнс“, контролирана од Талибанците, како што цитираше овој медиум, рече дека „навремената набавка на техничка опрема за авиони е клучен чекор кон обезбедување на безбедноста на патниците, одржување на уреден распоред на летови и обезбедување сигурни национални воздушни услуги“.
- Активирањето на нови мотори ќе го зголеми капацитетот на летовите, ќе ги намали доцнењата и техничките проблеми и ќе овозможи подобро планирање и за домашните и за меѓународните летови - додаде тој.
Според eplaneai.com, моторите се набавени за да се зголеми капацитетот на флотата и да се поддржат и домашните и ограничените меѓународни операции, во време кога Аријана се соочува со значителни финансиски притисоци и проблеми при набавка на резервни делови поради санкциите.
Фокусот на Србија и Турција покажува како регионалните добавувачи стануваат важни за компаниите кои немаат пристап до западните пазари, при што локалните MRO и сервисни центри се користат како клучни партнери за одржување на флотите на цивилните компании во санкционираните или изолирани земји.
Кои се конкретните добавувачи од Србија и Турција не е објавено.
© Vecer.mk, правата за текстот се на редакцијата
