Со официјална посета на градилиштето на Специјализираната изложба Експо 2027 Белград, успешно заврши Вториот состанок на меѓународните учесници (IPM), кој во изминатите три дена во главниот град на Србија собра околу 500 делегати од 138 земји. Овој значаен собир беше искористен за запознавање на светските претставници со наредните фази од развојот на комплексот, како и со клучните логистички и организациски чекори кои ќе ја одредат финалната подготовка за претстојниот глобален настан.
Во текот на работниот дел од состанокот беа потпишани вкупно 24 договори, со што дополнително се зацврсти импресивната бројка од 137 земји кои досега го потврдија своето учество. Со овој одзив, Србија стана апсолутен рекордер по бројот на пријавени држави во историјата на специјализираните изложби. Настанот предизвика и огромен медиумски интерес, со присуство на 57 медиумски куќи и над 170 новинари, сниматели и фоторепортери кои ги следеа активностите во белградскиот „Сава Центар“.
Учесниците на собирот беа поздравени од првиот потпретседател на Владата и министер за финансии, Синиша Мали, комесарката на Експо 2027, Јагода Лазаревиќ, генералниот секретар на Меѓународното биро за изложби (BIE), Димитрис Керкентзес и директорот на Експо 2027, Данило Јериниќ. Нивните пораки ја нагласија подготвеноста на земјата домаќин да одговори на сите предизвици и да обезбеди врвни услови за сите учесници.
За време на IPM состанокот, министри, амбасадори и директори на национални институции од секторите економија, туризам, иновации и култура ги дефинираа конкретните чекори за настап на своите земји. Одржани беа и 24 мини-конференции за новинари, на кои државите ги претставија концептите за своите павилјони, најавувајќи дека преку уметност и иновации ќе ги доближат својата традиција и идентитет до светската публика.
Специјализираната изложба Експо 2027 Белград ќе се одржи под темата „Игра(ј) за човештвото – спорт и музика за сите“. Овој голем меѓународен настан ќе ги отвори своите порти на 15 мај и ќе трае до 15 август 2027 година, позиционирајќи го Белград како центар на светската креативност и меѓународна соработка.
© Vecer.mk, правата за текстот се на редакцијата
