Вкупно 1.800 антички предмети меѓу кои голем број монети од различни периоди, животински и антропоморфни фигурини, разни предмети и антички маски, запленила грчката полиција во акцијата во која биле разбиени две криминални организации за трговија со антиквитети и уапсени се 39 лица, јави дописничката на МИА од Атина.
Од грчката полиција соопштија дека двете криминални организации имале меѓународен карактер, бидејќи антиквитетите нелегално се извезувале во странство и 800 од предметите биле пронајдени во Германија.
Акцијата била спроведена како во повеќе делови на Грција, така и во Германија каде што била активирана европска истражна наредба преку судските власти и Eurojust, додека од Атина било испратено и барање до САД за правна помош.
Во првата криминална организација, активна од 2022 година, биле вклучени 36 лица, од кои 32 се уапсени, а останатите четворица се идентификувани и се бараат во Германија и Грција.
Членовите на организацијата со помош на соодветни средства и детектори за метал вршеле нелегални ископувања со цел откривање и кражба на археолошки предмети, а антиквитетите нелегално ги пренесувале во странство.
Дел од втората криминална организација, активна од декември 2023 година, главно во северна Грција, биле десет лица од кои седум се уапсени, а по останатите се трага.
Сите уапсени биле изведени пред јавен обвинител во Солун.
© Vecer.mk, правата за текстот се на редакцијата
