Според информациите што протекоа од истрагата, човек од Немеа одиграл клучна улога во откривањето на злосторството. Откако бил приведен на сослушување и соочен со доказите собрани од крим-полицијата, тој наводно решил да раскаже сè што знаел за кобната ноќ.
Според полициски извори, овој маж признал дека пристигнал на Закинтос еден ден пред убиството, во договор со друг соучесник кој веќе бил на островот и знаел дека постарата жена има голема сума пари во посед. Планирале да ја ограбат, пишува iefimerida.gr.
Двајцата мажи ја поминале ноќта во еден од изнајмените сместувачки капацитети во сопственост на главниот осомничен за убиството. Веќе следниот ден, тие го спровеле својот план во дело.
„Носевме фантомки, маски и ракавици и ја нападнавме во заседа“, рече осомничениот од Немеа за време на испрашувањето.
„Чекавме да си дојде дома, а потоа ја нападнавме за да ѝ ги земеме клучевите и да влеземе во куќата. Се обидов да ја отворам вратата и во тој момент видов дека паднала и била покриена со крв. Му реков: „Ајде да бегаме!“ – и избегавме“, продолжи тој.
По крвавата пресметка, двајцата мажи го напуштиле местото на злосторството пеш, одејќи околу еден час пред да го повикаат синот на осомничениот да ги земе. Во меѓувреме, тие ја запалиле облеката што ја носеле и го фрлиле ножот што бил употребен во нападот.
„Во следните два месеци не се слушнавме, освен неколку кратки повици, за да не се поврземе“, тврдел човекот од Немеа.
Според она што досега го дознала истрагата, таткото и неговиот пријател работеле заедно на градилиште кога решиле да ја ограбат несреќната жена. Таткото живеел на Закинтос со својот син, додека третиот соучесник живеел во Немеа.
Наводно, таткото и пријателот, со покриени лица, отишле во куќата на жртвата, додека синот имал задача да ги транспортира. Главниот осомничен за убиството, според другите, е самиот татко - наводно ја избодел жртвата во внатрешниот дел од бутот, предизвикувајќи обилно крварење кое набрзо довело до смрт. Иако тој негира вмешаност во убиството, неговиот син и третиот соучесник го признале злосторството.
За потсетување, телото на несреќната жена го пронашол нејзиниот син наутро, пред влезот во куќата, во близина на автомобилот. Вештакот утврдил дека причина за смртта е убодна рана во левата бутина, над коленото, што довело до масовно крварење и смрт за неколку минути.
© Vecer.mk, правата за текстот се на редакцијата
