На седницата на Советот на Медицинскиот факултет при Универзитетот во Белград, денес беше донесена одлука да се смени од функцијата деканката Татјана Симиќ.
Заедно со неа, разрешени се и сите продекани задолжени за наставата.
Нова вршителка на должност декан на факултетот е професорката Наташа Милиќ. Таа во декември минатата година, веднаш откако почнаа блокадите, поднесе оставка на местото продекан, информира Nova.rs.
Последните неколку недели, Медицинскиот факултет во Белград забележа зголемено внимание од јавноста, особено поради одлуката на Министерството за здравство за привремена забрана на научни истражувања на овој факултет.
Забраната се однесува на истражувања што се спроведуваат врз пациенти без согласност од етичките комитети на институциите. Од почетокот на блокадите на Медицинскиот факултет имаше големо незадоволство кај професорите заради одлуките на деканатот. Токму од тие причини, на почетокот на годинава беше изгласан и генерален штрајк, кој подоцна беше прекинат.
Според студентите, професорката Симиќ на почеток се противела на блокадите, а потоа променила став и им дала поддршка на протестите.
Милош Павловиќ го напушти местото декан на ФДУ
Милош Павловиќ потврди за магазин „Неделјник“ дека повеќе не е декан на Факултетот за драмски уметности (ФДУ).
„Во изминатите седум години ја извршував функцијата декан во два мандати. Првиот мандат беше прекинат по една година поради измена на Законот за високо образование, а потоа повторно се кандидираав и бев избран за целосен мандат според новиот закон“, изјави Павловиќ.
Во вториот мандат, исто така, беше избран за декан, но овој мандат сега заврши.
Според неговите зборови, функцијата вршител на должност декан моментално ја извршува Драгутин Ќирковиќ. Тој е предложен од Наставно-уметничко-научниот совет, а е избран од Советот на ФДУ. Професорот Ќирковиќ ќе ја извршува должноста до завршување на редовната постапка за избор на нов декан.
Извор: 021.rs
© Vecer.mk, правата за текстот се на редакцијата
