Бранот на поскапувања поради пандемијата и војната во Украина влијае и врз туристичкиот сектор. Македонските агенции годинава за 5 до 15 евра го поскапеа организираниот превоз со автобус до Грција, па така, доколку повратниот билет кон Халкидики пред две години чинеше 35, сега чини 40 евра. Поголема е разликата во цените за превозот до дестинациите на Јонско Море, за каде повратен билет чини 50 или 55 евра.
Аранжманите од 9 ноќевања годинава скоро и да ги нема, па за цените за кои некогаш се поминувало 10, годинава се поминуваат 8 дена на море.
Во Грција, пак, веќе е најавено поскапување на основните намирници, но и на омилениот ручек – гирото, кое најверојатно ќе поскапи на 4 евра.
- Дали навистина ќе биде така, ќе треба да почекаме и лично да се увериме, бидејќи ситуацијата во моментов ја диктира војната во Украина и последиците од неа, а присутни се и последиците од короната. Немаме конкретни потврди за поголеми поскапувања, зависи до кога ќе трае сè, велат од српските туристички агенции за „Блиц“.
Грчките медиуми велат дека бранот на поскапувања ја зафати и Грција како и сите други земји. Зголемени се трошоците за живот, а цената на брзата храна е зголемена за околу 30 отсто. Се очекува гирото да биде четири или повеќе евра, а според Савас Цесидис, претседател на Панеленската федерација на месари, цената на свинското месо е повисока за 50 до 60 центи за килограм и 30 центи за килограм пилешко.
Грчкаинфо.цом објави дел од моменталните цени во Грција.
Шише „кока-кола“ е 1,90 евра, точено домашно пиво од 0,5 литри е 4, додека увезеното 5 евра.
Леб во Грција ќе ве чини 1 евро, сирење 4,48 евра, а млеко 1,31 евро. За десет јајца во Грција се потребни 3,26 евра, а за пилешки гради без коски седум евра.
Цената за јаболката, бананите, портокалите, доматите, компирот, кромидот, оризот, зелената салата е повисока за 20, 30, 40 или 50 центи од кај нас.
© Vecer.mk, правата за текстот се на редакцијата
