Како што објави Радио-телевизија на Република Српска (РТРС), работната група формирана по состанокот на раководството на РС ја завршила својата работа, а законските предлози сега се во рацете на Владата, која треба да ги разгледа и да ги достави до Народното собрание на РС за усвојување.
Претседателот на РС, Милорад Додик, претходно изјави дека од 1996 до 2000 година контролата на границите ја вршела полицијата на ентитетот, но на 13 јануари 2000 година тогашниот висок претставник Волфганг Петрич донел одлука со која била формирана Државната гранична служба на Босна и Херцеговина.
Додик тврди дека новите законски измени се во согласност со Дејтонскиот мировен договор и неговиот Анекс 2.
Во меѓувреме, директорот на Државната агенција за истраги и заштита (СИПА), Дарко Ќулум, поднесе оставка од функцијата, во согласност со законите што неодамна ги усвои Народното собрание на РС.
Владата на РС донесе уредба со која сите вработени во четири државни институции со седиште во РС треба да се повлечат до среда доколку сакаат да преминат во ентитетските институции. Доколку не го сторат тоа, се најавуваат санкции.
© Vecer.mk, правата за текстот се на редакцијата
