Хрватска денеска на свеченост во Франција го презема својот прв повеќенаменски борбен авион Рафал, а министерот за одбрана Марио Баножиќ изјави дека никој во овој дел на Европа нема да има помоќни воздушни сили од Хрватска, соопшти Министерството за одбрана.
Хрватска го презема првиот од дванаесетте договорени повеќенаменски борбени авиони Рафал на свечена церемонија во базата на француските воздухопловни сили Мон-де-Марсан.
„Сакам да нагласам дека модернизацијата на хрватските воздухопловни сили ќе обезбеди никој во овој дел од Европа да нема посилно, помодерно и помоќно воздухопловство“, рече Баножиќ.
Министерот за одбрана ова го оцени како „генерациски успех“ и заслуги на хрватската влада. Тој им се заблагодари на француските колеги, а особено на хрватските пилоти и техничари, се вели во соопштението.
„Се одлучивме за најдобриот авион од европска технологија“
„Иако ова е голем ден за Република Хрватска, ова е голем ден за нашите борбени пилоти кои покажаа колку посветени, професионални и стручни луѓе имаме во редовите на Хрватската армија. Благодарам на секој од нашите пилоти. Благодарам на секој воздухопловен техничар за сè што покажа за време на обуката во Франција: вие сте гарант за светлата иднина на хрватската армија и незаменлива клучна сила на нашите вооружени сили“, рече Баножиќ.
Министерот Баножиќ вчера најави дека првите шест Рафали ќе пристигнат во Хрватска на почетокот на вториот квартал од 2024 година, а другите според договорите.
Звонимир Фрка-Петешиќ, шеф на Кабинетот на претседателот на хрватската влада и копретседател на Меѓуресорската комисија одговорна за набавка на повеќенаменски борбени авиони, рече дека му е драго што хрватската влада „се определила за најдобриот авион, со француски и европски технологии“.
Баножиќ доби макета на авион со хрватски ознаки
„Способноста за проекција на моќност што ја добиваме со Rafale длабоко ќе ја промени стратешката позиција на Хрватска на геополитичката и воената карта на Европа. Рафал ќе биде неспоредлив“, изјави Фрка-Петешиќ.
Од хрватска страна присуствуваа и министерот за хрватски ветерани Томо Медвед и делегацијата на вооружените сили на Република Хрватска предводена од началникот на Генералштабот на вооружените сили на Република Хрватска, адмирал Роберт Храње, додека Франција беше претставена од делегација на вооружените сили и Министерството за одбрана на Република Франција предводена од инспекторот на вооружените сили на воздухопловните сили Лук де Ранкур.
Баножиќ доби модел на VBA Rafale со хрватски ознаки, а министерот му подари врамена пилотска капа и пилотска ознака на хрватското воздухопловство на францускиот генерал Ранкур.
Понатамошната обука на хрватските пилоти и техничари ќе биде спроведена во Центарот за обука во Бордо, се вели во соопштението за медиумите.
Хрватска е членка на ЕУ и НАТО, што значи дека е дел од колективниот безбедносен систем. Затоа, сеуште нема јасен одговор - зошто Хрватска се вооружува со најмодерните европски борбени авиони. За што ќе им се?
Извор: Индекс
Фото: MORH
