„Инаугуративниот состанок на Мешовитата комисија за исчезнати лица, формирана како дел од Политичката декларација за исчезнати лица 2023 година, ќе се одржи во Брисел на 15 јануари. Со состанокот ќе претседава ЕУ со делегации од Косово и Србија“,соопшти Прес-службата на ЕУ.
Претставниците на ЕУ објаснија дека станува збор за церемонијална средба која, според нив, ќе има повеќе симболично отколку суштинско значење.
Европски извори објаснуваат дека бидејќи предизборната кампања е во тек на Косово, нема големи очекувања дека првата средба ќе донесе некакви суштински резултати.
Се што очекуваат официјалните лица во Брисел од првиот состанок на Комисијата за исчезнати лица е партиите да ги претстават приоритетите и да се договорат за датумите на следните состаноци, на кои ќе има конкретни дискусии.
Воведниот состанок на Комисијата за исчезнати лица беше овозможен откако главните преговарачи на Србија и Косово на состанокот во декември се договорија за примена на декларацијата за исчезнати лица.
Таа декларација беше усвоена од лидерите на Косово и Србија, Албин Курти и Александар Вучиќ, на состанокот одржан како дел од дијалогот на 2 мај 2023 година.
Сепак, обврските од декларацијата - како целосен пристап до веродостојни информации, ставање на располагање на сите документи релевантни за утврдување на судбината на исчезнатите лица и заедничка работа преку комисија предводена од ЕУ - не се исполнети.
Според Црвениот крст, 1.612 лица се уште се водат како исчезнати за време на војната во 1998/99 година во Косово. /МИА
© Vecer.mk, правата за текстот се на редакцијата
