Осум лица се уапсени за царински измами на товар на ЕУ и запленети се 4,5 милиони евра во готово, во акцијата на грчката полиција што од вчера е во тек во царинската испостава на атинското пристаниште Пиреас, објавија грчките медиуми, јави дописничката на МИА од Атина.
Според истите информации, истрагата е по наредба од Канцеларијата на европскиот јавен обвинител за случај на измама против Европската Унија и освен во Грција, паралелно се спроведува во уште пет земји, односно во Италија, Шпанија, Бугарија, Франција и Белгија.
Грчката новинска агенција АНА-МПА пишува дека истрагата е за случај на измама од страна на компании за царинење, за шверц, поткуп и други сериозни кривични дела против Европската Унија.
Полициските службеници, освен во царинската испостава во Пиреас, извршиле претреси во 20 домови на царински службеници и во канцеларии, при што биле уапсени осум лица.
© Vecer.mk, правата за текстот се на редакцијата
